باوەشێن
فه‌له‌كه‌دین كاكه‌یی
بۆ روونكردنەوەی ئەوەی كە هەندێ كەس حەز ناكا ڕابردوو و، یادەوەرییەكانی بە بیر بێنەوە، بە شێوەی جۆر بەجۆر هەوڵدەدا فەرامۆشیان بكات.
واتە: هەندێ كەس لە (ڕاستی) خۆیان هەڵدێن، تا چەواشەكاریی ئێستایان دابپۆشن.
(2)
لە پەند و قسەی نەستەقی خۆماڵیدا دەگێڕنەوە:
- ژنێك، ڕۆژانە، قەبری هاوسەرە كۆچكردووەكەی باوەشێن دەكرد. بەیانی و ئێوارە، بە پەرۆشەوە خەریكی ئەوەبوو.
گوتیان: خاتوو! چییە؟ بۆچی خاكی گۆڕەكە باوەشێن دەكەی؟
ژنە وتی:
- هاوسەرە ئازیزەكەم، بەر لە مردن، گوتی: هە وەختێ گۆڕەكەم وشكەوە بوو، ئیتر بچۆ شوو بكە!
(3)
ئەوانەی كە راستییەكانی ژیان و مێژووی خۆیان و نەتەوەكەیان دەخەنە گۆڕ و دەیانەوێ لە یادیان بەرن، زوو بە زوو باوەشی گۆڕەكە دەكەن، تا بەپەلە لەو ڕاستیانە "رزگار" ببن و، ئیدی بە ئارەزووی خۆیان بچنە ڕێوە.
(4)
مێژووی كورد پڕە لە ڕاستی خۆش و ناخۆش، شیرین و تاڵ، سەركەوتوو و نەسەركەوتوو. خۆ بڵیمەتیی گەرەك نییە تا بزانین هۆكاری زۆربەی نوشوستییەكانمان نەزانین و لە خۆبایی بوون و، هەڵسەنگاندنی چەواشەیە. واتە: بە ژیری و هۆشیاری بارودۆخ و هەلومەرجەكان هەڵناسەنگێنین.
- هەندێ هەڵەی گەروە هەبوونە، ئەگەر قارەمانی ئەو سەردەمانە بە وریایی و ئاگایی لە هەڵەی كەسانی پێشووی خۆی بنۆربا ئەوە نەدەكەوتە هەمان هەڵەوە.
- ئێستاش، تا ئەمڕۆ، مەترسی هەڵەیەكی وەها هاتووەتە ئاراوە.. كە جوێنەوەی هەڵەكانی پێشووە.
مەترسی ئەوەیە.. كە دەرفەتی ئاشتیی و پێشكەوتنی مەسەلەكەمان لە باكوور، لە باربچێ! خۆ هەر پێشكەوتنێك بە تێگەیشتنی چەمكی دۆستایەتی و ئاشتی مسۆگەر دەبێ.
ئەز نازانم، بەچی ئامانج و ئایدیایەكەوە، وەها بە پەلە بەرەو تێكدانی ئەو هەلومەرجە دەڕۆن، كە دەروازەیەكی هیوابەخشی كردووەتەوە!
ئێ.. خۆ شەڕ و توندوتیژی زەحمەت نییە. مرۆڤ هەر وەختێك بیەوێ دەتوانێت شەڕ بنێتەوە! بەڵام هەمیشە لایەنی دیكەی هاوسەنگەكە هەیە. ئاشتبوونەوەش هەروەها، كە بە دوو لایەنی هاوسەنگەكە دەكرێت. وەلی پەیداكرنی هەلومەرجی ئاشتی زەحمەتترە لە هی شەڕ.
(5)
مێژوویەكی فراوانی هەڵكشان و داكشان و، هەوراز و نشێویمان هەیە.. بەشێكیمان ژیاوین.
ئەمڕۆ، دوو دەسەڵاتی سیاسی بە توانا لە ئارادان. كە دەڕوانینە ملیۆنان ئینسانی كورد و تورك، دەبینین رۆژانە پێكەوە دەژین و، دەدەن و دەشێنن و، كێشەی ئاڵۆزیان لە ئارادا نییە. كەواتە لە هەردوولادا خواستی ئاشتی و ئارامی هەیە.. بەڵكو بەهێزیشە. بەڵام ڕەنگە كەسانێك (یا گرووپگەلێك) لێرە و لەوێ هەن، نایانەوێ ئاشتی سەقامگیر بێ.. ئیتر بە هەر حسابێك بێ، ئەو كەسانە ئاشتی لە بەرژەوەندی خۆیانا نابینن.
هەمیشەش كەمینەیەكی بچووك توانیویەتی باری گشتی بەرەوخراپی و ناهەمواری ببات. ئەوەش راستییەكی تاڵە. ئەوەش لە كاتێكدا كە زۆرینە ئارەزووی ئاشتی و دۆستایەتی و برادەرینە.
(6)
گەلۆ!
ئەوەی هۆشیار و دڵسۆزە، ئەوەی ژیر و بەئاگایە، ئەوەی لە مێژووی نزیك و دوور تێگەیشتووە، چ تورك بن یا كورد، دەبێ ئیرۆ لەوە بگەن، كە لە هەردوو لاوە، هەردوو دیوەوە، هەردوو وارەوە، هەر كەس بەپێی توانا و وزەی خۆی، تێبكۆشن بۆ سەرخستنی ئاشتی و، بەگەڕخستنەوەی دیالۆگ، بە گیانی دۆستایەتی و مرۆڤدۆستی، جیهانی نوێی خۆیان بخوڵقێنن.
رێگەی دیكە.. ناهەمواری و مەینەت و پەشیمانییە.
ئەوانەش كە دەیانەوێ ئەزموونەكانی ڕابردوو لە یادی خەڵك ببنەوەو چەواشەكاری برەو بدەن، ئەوە رێگەی رزگاری دوور دەخەنەوە.
مەرجی دۆستایەتی كورد-تورك، لەم هەلومەرجەدا، ئەوەیە كە بە سنگی فراوان، بەسەر تەگەرە و كۆسپ و تەسكبینیدا باز بدەین و، بگەڕێینەوە سەر جادەی ساف و هەموار، تا بە كەمترین ئازار و قوربانی و زیان بە مەنزڵ بگەین.
پاساوای هەڵە نەدەینەوە
باوەشێنی گۆڕی مێژوو نەكەین!
