ئەرێ هەرێم دێ ب ئێكجاری رادەستی بەغدا بیت؟
رەوان نهێلی
خیانەتا 16 ئوكتوبەرێ، بوو ئەگەر بەغدا گەلەك سزایان سەر هەرێمێ ب سەپینیت، وەكو گرتنا فرۆكخانان و گرتنا دەریێ حاجی ئومەران و گەلەك سزایێن دی، ب تایبەت سزایێ كێمكرنا پشكا هەرێمێ ژ بودجەی ژ 17% بۆ 12% كو ئەڤ چەندە وێ راستیێ دسەلمینیت كو ئیدی قوناغەك ل بەغدا یێ پەیدابووی كو سەردەمێ تەوافوقێ نەمایە، ئانكو مادەم قوناغەكا ب ڤی رەنگی پەیدابوویە، دڤێت كورد خوە ل گەل عیراقێ بگونجینن، هەتا بڕیارا خوە نەڤەكێشانا هەرێمێ ل بەغدا پشتی بودجێ هەرێمێ كێم كری، دبینم بڕیارەكا د جهێ خوەدایە، چونكە دڤێت هەرێم رەفتارێ ل گەل ڤێ قوناغێ بكەت و خوە ل چارچوڤێ عیراقێ رێك بێخیتەڤە و ئێدی بهێزتر بهێتە ناڤ گورەپانا سیاسی یا عیراقێ و نەبیتە پاشكویا هێز و لایەنێن دی و دیسا رۆلێ خوە بگێریتەڤە، بجه ئینانا ڤێ چەندێ ژی پێدڤی ب هەول و بزاڤا سەرۆك بارزانی و سەرۆك وەزیرێن هەرێمێ هەیە كو نەخشەكێ بهێز بۆ هێزێن كوردستانێ بهێتە دانان كو پشتی هەلبژارتنێن عیراقێ، كورد د ئێك فراكسیونا پەرلەمانی دا ئێك بگرن و ب وی مەرجی هەڤپەیمانیا ل گەل لایەنێن عیراقی گرێ بدەن كو مافێن دەستووری یێن كوردان بهێنە دان كو ژ ئەنجامێ روودانێن 16 ئوكتوبەرێ بەغدا ل سەر هەرێمێ سەپاندی.
بەردەوامی دانا سەرۆك وەزیرێن هەرێمێ ب ڤێ سیاسەتا پابەندبوون ب دەستوور و رەتكرنا ئەمرێ واقغ یێ نە دەستووری، سەنگا بەغدا ل دەف جڤاكێ نێڤدەولەتی سڤگ بوویە، رەنگە ژی هەتا نوكە سەرۆكێ فرەنسا سەرەدانا خوە بۆ عیراقێ پاشت ئێخستی یە ژبەر كو دخوازیت هەرێمێ ب هێز ببینیت و دخوازیت پشتی عیراقێ سەرەدانا هەرێما كوردستانێ ژی بكەت و رەنگە ژی ئێكەم سەرۆك بیت پشتی ڤەكرنا فرۆكخانێن هەرێمێ، دێ سەرەدانا كوردستانێ بدەت، دووبارە دووپاتیێ ل وێ یەكێ كەم چەند ئابلوقێن سەر هەرێمێ بهێتە شكاندن، بەلێ ئەگەر ناڤ مالا كوردی نەهێتە رێكخستن و چ پێشڤەچوون نەهێتە پێش، دێ ئاسویێ مللەتێ مە هەر یێ تاری بیت و ئەم پێشیا خوە ب بوهستەكێ ژی نابینین، ژبەر كو كێشا مە ل گەل بەغدا ب تنێ مووچە و ڤەكرنا فرۆكخانا نینە، هەروەكی سەرۆك بارزانی فەرمووی، مە گەلەك كێشەیێن گەل بەغدا یێت هەین كو ب تنێ ب ئێكگرتنێ دێ شێن ڤان كێشان چارە كەین.
