یەكریزی ،خۆراگری میللەتی كورد، شكۆی وقەوارەی سیاسی كوردستانی پاراست ..
رێبوار حەمەلاو شوانی
لەم روانگەوە ئەگەر سەیرێكی ژمارەی لیست و قەوارە و هاوپەیمانێتی ئەو هێزانەی كە بۆ بەشدارییكردن لە هەڵبژاردنەكانی داهاتووی عێراق بكەین، دەبینین پەرتەوازەیەكی ئەوەندە زۆر و زەوەندبوونی هەیە، نەك یارمەتیدەر نابێت بۆ بە دەستهێنانەوەی ئەوەی لە دەستمانداوە بەهۆی خیانەتی 16ی ئۆكتۆبەر و گێڕانەوەی مافە دەستووریی و یاساییەكانی گەلی كوردستان لە عێراق، بەڵكو ئەوەی لەبەر دەستیشمان ماوە، بە هۆی ئەو پەرتەوازەییەی ئێستاوە لە فرەلیستی كورد دەیبینین، ئەوانەی ماوەن ئەوانیش لە دەستدەدەین، بۆیە ئێستە بواری بەخۆداچوونەوە لە پرسی تۆماركردنی لیست و قەوارە و هاوپەیمانی بۆ هەڵبژاردنەكانی عێراق نەماوە، بەڵام ئێستەش زووە تا چارەسەری ئەو غروری و عینادی و ئەو كولتوورە خراپەی حزب و سەركردەكانی كورد بەرامبەر یەكتر هەیان بووە بكرێت كە بە هیچ شێوەیەك ئەگەر بۆ پرسی نەتەوەیی و نیشتمانیش بێت ئامادەییان تێیدا نییە، سەر بۆ یەكتر دابنوێنین، بەڵكو بە ئاسانی سەر بۆ دوژمن و ناحەزانی میللەتەمان دادەنوێنن، هێشتا زووە بیر لە مەسەلە نەتەوەیی و نیشتمانییەكانمان بكەینەوە، گرنگە لە ئێستە بە دواوە بیر لە دوای هەڵبژاردنەكان بكەنەوە و هاوپەیمانێتییەكی سەرتاسەری كە تەواوی هێز و لایەنە سیاسییە كوردستانییەكان لەخۆ بگرێت بەبێ گەڕانەوە بۆ جیاوازیی دیدوبۆچوون و تێڕوانین و ئایدۆلۆژیا لەمەڕ هەموو ئەو پرسانەی لە ناوەخۆی كوردستاندا بەرامبەر بە یەكتر هەمانە، پێكهێنانی هاوپەیمانێتی »كوردستانی« بۆ دوای هەڵبژاردنەكان، باشترین بژاردەیە تا كورد بە لایەنی كەم سارێژی هەندێك لە برینەكانی ئێستای بكات، پێموایە چوار ساڵی داهاتوو دوایین دەرفەتی بەردەم زیندووبونەوە و بەهێزبوونەوەی كورد دەبێت لە بەغدا، ئەگەر ئەم هەنگاوە نەنێین كەوتنەكانمان ئەوەندە كاریگەر دەبێت، هەستانەوەمان تارادەیەك ئەستەم دەبێت، بەهێزبوونەوەی كوردیش لە بەغدا و وەستانەوە دژی هەموو هەوڵە جۆربەجۆرەكانی دەسەڵاتدارێتی بەغدا و بە تایبەتیش سەرۆكوەزیرانەكەی ئەركی سەرشانی هەموو هێزە سیاسییەكانی كوردە، گرنگە بەرژەوەندییە حزبییەكان وەڵابنرێت و ئەمجارە بە كردەوە بەرژەوەندییە نەتەوەیی و نیشتمانییەكان لە ریزی پێشەوەی هەموو شتێك بێت، ئەگەر ئەمە بەدیهات بە دڵنیاییەوە هەمان یەكگرتوویی و یەكگوتاری لە ناوخۆی كوردستانیش رەنگدەداتەوە و بگرە دێتە ئاراوە بەشێوەیەك پەڵ بۆ چارەسەركردنی كێشە ناوخۆییەكانی هەرێم و پرسی خراپی دارایی خەڵك دەهاوێژێت كە ئەمەش داوا و خواستی ئێستای كۆی خەڵكی كوردستانە. ئیدی كاتی هاتووە هەموو لایەك بەردەوامی بە ورەی بەرزمان بدەین و ئیرادەی پۆڵاین لەدەست نەدەین زیاتر بەرگەی سەختیەكانی ژیان بگرین و یەكرێزی ویەك گوتاری نێومالی كورد هەنگاو بۆ ئایندە بنێن بەتایبەت كە دوای چەند مانگێكی تر عێراق بەرەو قۆناغی هەڵبژاردن دەچێت كە پرۆسەكە ئەم جارەیان جیاوازترە لەگەل پرۆسەكانی تر چونكە دوژمنان گرەو لەسەر لێك ترازانی لایەنە سیاسیەكانی كوردستان دەكەن كە حەقە كێشە و گرفتە نێوەخۆیەكان بەلاوە بنێن و لە ئاست هەستیاری قۆناغەكە دابین لە چوارچێوەیەكی نیشتمانی بۆ ئەوەی سەنگ و قورسایی كورد بەدیار بكەوێت كە ئیستاكە لە عێراقدا هەمان بیركردنەوە شۆڤێنی جاران هەرماوە كە ئەویش برتیی یە لە نەمانی كورد و نەدانی مافەكانیەتی بۆیەش هەر لێكترازان و جیابوونەوەیەك بەزیانی خەڵكی كوردستان و سوودی دوژمنانی گەلەكەمان كۆتایی پێ دێت.
