71 سال ده‌رباز دبن ل سه‌ر دامه‌زراندنا پارتى دیموكراتى كوردستانى كوردستان، پارتى گه‌له‌ك سه‌رئه‌ڤرازى و سه‌رنشیڤى دیتى نه، روى ب روى گه‌له‌ك ئاسته‌نگان بوویه ب تایبه‌ت ل گه‌ل حوكمه‌تێن ئێك ل دویڤ ئێك یێن عیراقێ، رژێما به‌عسا ژ ناڤچوویى ب هه‌مى وێ هێزا خوه‌ڤه، نه‌شیا ئیرادا ملله‌تێ كورد ژ ناڤ ببه‌ت و ژ ئه‌نجامێ وێ به‌رخودانا پێشمه‌رگه‌ى ئه‌وا ل چیایێن كوردستانێ دژى رژێمێ ل ده‌ڤه‌رێن جودا جودا دكر، مه‌زنترین ده‌ستكه‌فت بۆ ڤێ پارچا كوردستانێ بده‌ستڤه ئینا، ئه‌وژى بلندكرنا وره‌یا خه‌لكى و د ئه‌نجامدا په‌یدابوونا سه‌رهه‌لدنا سالا 1991 ێ، ره‌نگه ئه‌و قوناغه مه‌زنترین ده‌ستكه‌فت بیت كو ئه‌وژى هه‌لكێشانا بایێ ئازادیێ و پاشان هه‌رێم بوو خودان په‌رله‌مان و سازى، نوكه و پشتى ده‌ربازبوونا 71 سالان، بێ گومان ب سه‌دان گوهۆرینێن ناڤخویى و ئیقلیمى و جیهانى دروست بوویه، قوناغ یا جودایه، ل شوونا ئازادیێ خه‌لكى سه‌رخوه‌بوون و ده‌وله‌ت دڤێت، نێچیرڤان بارزانى جێگرێ سه‌رۆكێ پارتى دیموكراتى كوردستان ل سالڤه‌گه‌را 71 سالیا دامه‌زراندنا پارتى دا ئاماژه ب هندێ كر كو پارتى دیموكراتى كوردستان د پرسا سه‌رخوه‌بوون و سه‌روه‌ریا نه‌ته‌وه‌ییا گه‌لێ كوردستانێ دا پێشه‌نگ بوویه و پشكداریا كاریگه‌ر یا كادر و ئه‌ندامێن ڤێ پارتى، به‌لگه‌یا دلسوزیا وانه بۆ ڤێ رێبازێ، ئه‌ڤ چه‌نده گه‌له‌ك راسته و دیرۆك شه‌هده‌هیێ بۆ دده‌ت، ژبه‌ر كو یا رونه پێنگاڤێن سه‌ركردایه‌تیا پارتى دیموكراتى كوردستان بێ پلان نه‌بووینه، پارتى به‌رده‌وام د نوویبوونێ دایه، له‌وما ژى ل كۆنگرێ 13 دروشمێ خوه كره (نوویبوون، دادپه‌روه‌رى، پێكڤه‌ژیان )، ئه‌ڤ نویبوونه ئه‌وه كو خوه ل گه‌ل هه‌ر سه‌رده‌مه‌كى دگونجینیت، ژبه‌ر هه‌ستیارا ڤێ قوناغێ پارتى دروشمێ سه‌رخوه‌بوونێ هه‌لبژارت، ژبه‌ر كو كورد ئێدى نه‌شێن چاره‌نڤیسێ خوه ب ده‌وله‌ته‌كێ ڤه گرێبده‌ت كو پاشه‌روژا وێ نه‌یا دیار و میلیشا ب رێڤه دبه‌ن، كورد چاوا چاره‌نڤیسێ خوه ب به‌غداڤه گرێ بده‌ت یا كو رێز ل دستوورێ عیراقێ و مافێ خه‌لكێ كوردستانێ نه‌گرتى، ئه‌و به‌غدایا رێز ل بجهئینانا مادێ 140 نه‌گرتى و بزاڤ كرى هێزا پێشمه‌رگه‌ى لاواز بكه‌ت و فشار ئێخستیه سه‌ر هه‌رێمێ بۆ هنده‌ك مه‌رامێن سیاسى كو ل سالا 2014 بودجه و قووتێ خه‌لكێ كوردستانێ برى، له‌وا پارتى هزر دكه‌ت كو باشترین چاره‌سه‌رى بۆ ڤێ قوناغێ ریفراندوم و سه‌رخوه‌بوونه داكو ئێدى هاولاتیه‌كێ هه‌رێمێ ژیانه‌ك سه‌رفه‌راز و دویر ژ گه‌فێن وه‌لاتان ببه‌ته سه‌ر، بێ گومانه ده‌وله‌تێن زلهێز یێن جیهانى ژى ئه‌ڤرۆ یان سوبه هه‌ر دێ پشته‌ڤانیێ ل بریار و ئیدارا گه‌لێ كورد كه‌ن، ژبه‌ر كو حوكمه‌تا هه‌رێما كوردستانێ گه‌له‌ك ب سه‌ركه‌فتیانه یا شیاى مافێ هه‌موو پێكهاتێن ناڤ هه‌رێمێ ب پارێزیت كو ئه‌ڤه‌ژى د چاڤێ وه‌لاتێن جیهانى دا خاله‌كا زۆر گرنگه، د ده‌مه‌كێ دا كو ل چه‌ندین جهێن دونیایێ ئه‌ڤ پێكهاتێن رێژا وان كێم ژیارا وان ل به‌ر گه‌فانه، له‌وما پێدڤیه كورد د ڤێ ره‌وشا عیراق كه‌تیێ ژ په‌رت و به‌لاڤیێ، خوه بكه‌نه ئێك، پتر ناڤ مالا خوه رێكبێخن، په‌رله‌مانى كارا بكه‌نه‌ڤه و هه‌موو پارت پێكڤه و ب ئێك ده‌نگ روى ب روى هه‌ر گه‌فه‌كا ده‌ره‌كى ببن و ل گه‌ل پێشه‌نگیا پارتى بۆ پرسا ریفراندومێ د هاریكاربن و ڤێ ده‌رفه‌تا دیرۆكى ژ ده‌ست نه‌ده‌ن و ریفراندومێ و پاشان ده‌وله‌تا خوه رابگه‌هینن.
رەوان نهێلی
