ژمارەی ئەو پەنابەرانەی لە ڕۆژئاوای كوردستان ڕوویان لە هەرێمی كوردستان كردووە لە سنووری 100 هەزار كەس نزیك دەبێتەوە. بەسەرهاتی هەر كامە و هەر خێزانێكی ئەو پەنابەرانە چیرۆكێكی پڕ لە ئازار و تڕاژیدیایە. دووركەوتنەوە لە زێدی بابوباپیران و باری خەراپیی دەروونی و سەرما و بێبەشبوونی منداڵان لە قوتابخانە و نەخۆشی و برسێتی و دەیان كێشەی دی ناوەڕۆكی ئەو ژیانە ناخۆشەن خوشك و براكانمان لە ڕۆژئاوای كوردستان تووشی هاتوون.
ئەركی سەرشانی یەكە بە یەكەی سیاسی و میدیاكار و هونەرمەند و ڕۆشنبیر و ڕێكخراوەكان و هاووڵاتیی ئاساییە هەر یەكەو بەشبەحاڵی خۆی وەك ئەركێكی نیشتیمانی و مرۆڤپارێزانە یارمەتیی پەنابەرانی ڕۆژئاوا بدەن. چونكە چارەنووسمان هاوبەشە و باشتر لە هەر كەسێك لە ژانەكانی یەكتری دەكەین و دۆخی ئاوارەیی و چەرمەسەریی بۆ هەموومان ئاشنایە و لەگەڵیدا ژیاویین.
جگە لە ڕەهەندە مرۆڤییەكەی ئەوە ئاوارەبوونە دەستەجەمعییە پێویستە لایەنی سیاسیی دۆخی كوردانی ڕۆژئاوا بدەینە بەر سەرنجمانەوە و كاری بۆ بكەین. ئاوارەبوونی ڕۆژئاواییانی كوردستان ئەویش بەو قەبارەیە چیی لە كوڕەو و ئاوارەییە دەستەجەمعییەكانی گەلی كورد لە سەدەی بیستەمدا كەمتر نییە لە ناوەڕۆكیشدا لەگەڵ یەكتر جیاواز نین. ئەوەیشیان ڕاكردنە لە قڕبوون و ستەمكاری و خۆبەدەستەوەدان. گەڕانە بەدوای مسۆگەركردنی داواكاری و مافە نەتەوەییەكان. قبووڵنەكردنی ئەو كڵێشە سیاسییانەیە كە دەوڵەتە داگیركارەكانی كوردستان و سیستەمی نێودەوڵەتی بەسەر كوردستانیانیدا سەپاندووە.
لە لایەكی دیكەوە هەر چەند كات تێدەپەڕی كێشەی سووریا قووڵتر و ئاڵۆزتر دەبێ. وا ڕژێمەكەی ئەسەد دەست لە هیچ تاوانێك ناپارێزی بۆ سەركوتكردنی خەڵك و پارێزگاریكردن لە مانەوەی خۆی. هێزی توندڕۆی ئیسلامی بە شێوەیەكی بەرفراوان دەستی خزاندۆتە نێو لایەنە چەكدارەكانی ئۆپۆزیسیۆن. دەستگە هەواڵگرییەكانی ناوچەكە لەنێو سووریادا زۆر چالاكن. لایەنە كوردییەكان هێشتا بە تەواوەتی بەو قەناعەتە نەگەییشتوون لەبارەی چارەنووسی سووریا یەكهەڵوێست بن و پابەندی ڕێككەوتنەكەی هەولێر بن. لایەنی كوردیمان هەیە ڕاستەوخۆ خزمەتی ئەجێندای ڕژێمی سووریا و هاوپەیمانانی دەكات. كۆنفڕانسە ئەمنییەكەی ڕۆژی شەممەی شاری (مۆنیخ)ـیش كە بە بەشداریی زلهێزەكان و ژمارەیەكی زۆری سیاسیی دەستڕۆییشتووی جیهانی ساز درا ئەو مەترسییەی لێ دەكەوێتەوە دواڕۆژی كورد لە سووریا دووبارە ببێتەوە قوربانیی ڕێككەوتن و تەوافوقاتی هێزە هەرێمایەتییەكان و زلهێزەكانی جیهانی.
ئەو تابلۆیە وێنەیەكی تەمومژاوی و ئاڵۆزی دواڕۆژی ڕۆژئاوامان پێشان دەدات. پابەندبوونی لایەنە كوردییەكانی ڕۆژئاوا بە ڕێككەوتنی هەولێر و پاڵپشتیی سیاسیی تێكڕای لایەنە سیاسییەكانی هەرێم بۆ ڕۆژئاوای كوردستان دۆخی كورد لەو بەشەی كوردستان تۆكمە و توندوتۆڵتر دەكات. بە پێچەوانەوە حەزی یاریی پشتپەردە و هەڵپەڕینی ژمارەیەك لایەنی سیاسیی كوردی بە ئاوازی بەرژەوەندیی بەرتەسكی حزبی و هاودەستییان لەگەڵ دامودەستگەكانی هەواڵگریی ناوچەكە بێ شك كێشەی كورد بەرەو ئاڕاستەیەكی زۆر ناڕوونتر لەوەی ئێستا هەیە دەبات و، خەبات و ئاوارەیی و كۆلنەدانی گەلی كورد لە سوورییاش بەرهەمێكی ڕاستەقینەی لێ سەوز نابێت.