ئەمڕۆ هەینی كەسایەتییەكی نزیك لە موقتەدا سەدر ڕێبەری سەدرییەكان و هاوپەیمانیی ئەلسائیرونی گەورەترین فراكسیۆنی پەرلەمانی عێراق داوای كرد هەینیی داهاتوو خۆپیشاندانە ملیۆنییەكە لەوانی پێشوو فرەوانتر بێت، چونكە چارەنووسی عێراق یەكلا دەكاتەوە.


ساڵح محەمەد عێراقی كەسایەتی نزیك لە موقتەدا سەدر لە هەژماری خۆیدا لە تۆڕی كۆمەڵایەتیی (فەیسبووك) رایگەیاند خۆپیشاندانەكەی هەینیی داهاتوو ملیۆنی دەبێت، بەڵام نابێ وەكو خۆپیشاندانەكانی رابردوو بێت، بەڵكو ئەمجارە پێویستە فرەوانتر بێ و خەڵكێكی زیاتر بەشدارییان تێدا بكەن.


ساڵح عێراقی ئەوەشی نووسیوە كە خۆپیشاندانی هەینیی داهاتوو چارەنووسی نیشتمان و سەروەرییەكەی و سەربەخۆیی و ئازادییەكەی یەكلا دەكاتەوە.


كەسایەتییەكە نزیكەكەی موقتەدا سەدر، سوپاسی ئەوانە دەكات كە پشتیوانی نیشتمانن، دەشڵێ خودا لەوانە خۆش بێت كە پشتیوانی لە نیشتمان ناكات.


جێی باسە ڕۆژی سێشەممەی رابردوو موقتەدا سەدر داوای خۆپیشاندانێكی ملیۆنی كردبوو بۆ سەركۆنەكردنی هێزەكانی ئەمریكا لە عێراق.



باسنوز