سەرکردەیەکی شیعەمەزهەب چەندا زانیارییەکی لەبارەی فەرماندەی کوژراوی سوپای قودسی ئێرانی و جێگری سەرۆکی دەستەی میلیشیاکانی ححەشدی شەعبی، بە ئەمریکا داوە.

ماڵپەڕی (ئەلعەرەبییە) راپۆرتێکی بڵاو کردووەتەوە و تێیدا دانپێدانانەکانی قەیس خەزعەلی، سەرۆکی میلیشیای عەسایب ئەهلی حەقی بڵاو کردووەتەوە.

قەیس خەزعەلی، کە لەنێوان 2007-2010 لەلایەن هێزەکانی ئەمریکاوە دەستگیر کرابوو، لە یەکەم دانیشتنی لێکۆڵینەوە لەگەڵیدا، چەند زانیارییەکی بۆ ئەمریکییەکان ئاشکرا کردووە.

هەروەک ئەلعەرەبییە بڵاوی کردووەتەوە، خەزعەلی پەیوەندیی میلیشیا شیعەکان و سوپای پاسدارانی ئێرانی بۆ ئەمریکییەکان ئاشکرا کردووە.

سەرۆکی عەسایب ئەهلی حەق دانی بەوەشدا ناوە، کە لە چەند سەربازگەیەکی ئێران مەشق بە چەکدارە شیعەمەزهەبە عێراقییەکان کراوە و ئێران چەکی بەو میلیشیا عێراقییانە داوە.

قەیس خەزعەلی چەندا زانیارییەکیشی لەبارەی قاسم سولەیمانی بە ئەمریکییەکان داوە، بەڵام زانیارییەکان بڵاو نەکراونەتەوە.

لەبارەی ئەبو مەهدی موهەندیس، خەزعەلی لە 4-4-2007 بە ئەمریکییەکانی گوتووە، موهەندیس پەیوەندییەکی بەهێزی لەگەڵ ئێران هەیە و خێزانەکەشی هەر لەو وڵاتە دژین.

بەرەبەیانی رۆژی هەینی 3-1-2020، سوپای ئەمریکا لەڕێی فڕۆکەی بێفڕۆکەوانەوە، کاروانێکی چەکداریی حەشدی شەعبی لە فڕۆکەخانەی بەغدا بۆردومان کرد.

بەهۆی بۆردومانەکەوە، هەریەکە لە ئەبومەهدی موهەندیس، جێگری سەرۆکی دەستەی میلیشیاکانی حەشدی شەعبی و قاسم سولەیمانی، فەرماندەی سوپای قودسی سەر بە سوپای پاسدارانی ئێران و نۆ بەرپرس و چەکداری دیکەی حەشدی شەعبی، کوژران.

قاسم سولەیمانی، کە لە 11-3-1957 لە گوندی قەنات مەلەک لە شاری کرمان لە باشووری رۆژهەڵاتی ئێران لە دایک بووە. سولەیمانی یەکێک بوو لە فەرماندە و بڕیاربەدەستە باڵاکانی ئێران.











باسنيوز