سەرۆککۆماری عێراق ئیدانەی هێرشی ئەمریکا بۆ سەر بارەگاکانی حەشدی شەعبی دەکات و دەڵێت، پێشێلکردنی سەروەریی عێراقە، هەروەها داوادەکات کە ململانێ ناوچەیی و نێودەوڵەتییەکان لە عێراق دوورخرێنەوە.

بەپێی راگەیێندراوێکی سەرۆکایەتی کۆماری عێراق، بەرهەم ساڵح، سەرۆککۆماری عێراق سەرکۆنەی هێرشی ئاسمانیی ئەمریکای کردووە بۆسەر بارەگاکانی حەشدی شەعبی لە قەزای قائیم و بە سەرپێچی بۆ سەروەری عێراق لە قەڵەمی دا.

ھاوکات سەرۆككۆمار لەگەڵ لایەنە حكومییەكان بەدواداچوون دەکات لەبارەی زیانە گیانی و ماددییەکانی هێرشەکە، جەختیشیكردەوە لەسەر پێویستی رێزگرتن لە سەروەری وڵات و پاراستنی ئاسایش و ئارامی و زامنکردنی پارێزگاری لە نوێنەرایەتی باڵیۆزخانەکان و بنکە سەربازییە عێراقی و نێودەوڵەتییەکان کە پاڵپشتن بۆ هەوڵەکانی عێراق لە بەگژداچوونەوەی تیرۆر.

لە راگەیێندراوەکەی سەرۆکایەتی کۆماری عێراق ئاماژە بەوەش کراوە، بە بەرپرسیارێتی دوو قۆڵی لەبارەی رێکكەوتننامەی ئیمزاکراو لەنێوان عێراق و ئەمریكا کە جەخت دەکاتەوە لەسەر کارکردن بۆ پشتیوانیكردنی دەوڵەتی عێراق، پتەوكردنی ئارامی و پارێزگاریکردن لە سەروەری عێراق؛ هاوکات کاری هاوبەشی لە بەگژداچوونەوەی تیرۆر دووپاتکردەوە.

سەرۆكکۆمار لە راگەیێندراوەکەدا جەختیکردووەتەوە لەسەر پێویستی دوورخستنەوەی عێراق لە ململانێ ناوچەیی و نێودەوڵەتییەکان و دەڵێت "پێویستە دان بەخۆدا بگیرێ و دۆخەکە ئارام بکرێتەوە و هیچ جۆرە کاردانەوەیەک روونەدات کە زیان بە وڵات بگەیەنێت لەم دۆخە هەستیارەدا".

لەو راگەیێندراوەدا سەرۆککۆمار پرسە و سەرەخۆشیی خۆی گەیاند بە كەسوكاری" شەهیدان" و قوربانییەكانی هێرشە ئاسمانییەکە و "داوای لە پەروەردگار دەکەم بە رەحمەتی خۆی شیفای هەرچی زووی بریندارەكان بدات".

رۆژی یەکشەممە 29-12-2019 وەزارەتی بەرگریی ئەمریکا رایگەیاند، پێنج هێرشیان بۆسەر بنکەکانی کەتایبی حیزبوڵڵای عێراقی لە سووریا و عێراق ئەنجامداوە؛ هێرشەکانیش بە فڕۆکەی ئێف 15 ئەنجامدراون.

حەشدی شەعبی سەبارەت بە ژمارەی کوژراو و بریندارانیان لە هێرشەکەی ئەمریکا بۆسەر بنکە و بارەگاکانیان دەڵێت، 28 کوژراو و 48 بریندار هەن.