فەرماندەیی ئۆپەراسیۆنە هاوبەشەکانی عێراق رایگەیاند، هێرشەکانی سوپای ئەمریکا بۆ سەر بنکەکانی حەشدی شەعبی بووەتە هۆی کوژرانی چوار ئەندامی حەشد و برینداربوونی 30 چەکداری دیکە.

شانەی راگەیاندنی جەنگیی ئۆپەراسیۆنەکانی عێراق رایگەیاند، هێرشەکە کاژێر 7:00ی ئێوارەی یەکشەممە سێ بنکەی لیوای 45ی حەشدی شەعبی لە رۆژئاوای ئەنبار کردووەتە ئامانج، ئەوەش لەکاتێکدایە کە هێزەکانی حەشدی شەعبی سەرقاڵی ئەنجامدانی ئۆپەراسیۆن بوون دژی چەکدارانی داعش.

پێشتر وەزارەتی بەرگریی ئەمریکا لە راگەیێندراوێکدا رایگەیاند، پێنج هێرشی سەربازیی لە دژی بنکەکانی حیزبوڵڵای عێراق ئەنجامداوە، ئەویش وەک وەڵامی ئەو هێرشەی گوایە هێزەکانی حیزبوڵڵای عێراق لە دژی بنکەی سەربازیی کەی وەن ئەنجامی دابوو لە پارێزگای کەرکووک کە بەهۆیەوە هاووڵاتییەکی ئەمریکی کوژرا و چوار سەربازی دیکەی ئەمریکی و دوو ئەندامی هێزە عێراقییەکان برینداربوون.