سەرۆکی کوتلەکانی پەرلەمانی عێراق بۆ دیاریکردنی سەرۆک وەزیرانی نوێی ولاتەکەیان، کۆ دەبنەوە.

بەپێی هەواڵێکی ماڵپەڕی (سۆمەرییە نیوز)، ئێوارەی ئەمڕۆ شەممە 21-12-2019، سەرۆکی کوتلە و فراکسیۆنەکانی پەرلەمانی عێراق، کۆ دەبنەوە.

لەو کۆبوونەوەیەدا، سەرۆکی کوتلە سیاسییەکان تاوتوێی دوو بابەت دەکەن، کە بریتین لە؛

- دیاریکردنی کەسێک بۆ جێگرتنەوەی عادل عەبدولمەهدی

- پرۆژەیاسای هەڵبژاردنی پەرلەمانی عێراق، کە هەفتەی رابردوو 14 ماددەی پەسەند کرا.

عادل عەبدولمەهدی (لەدایکبووی 1942 لە بەغدا)، لە مانگی 10ـی 2018 وەک سەرۆک وەزیرانی عێراق دەست بەکار بوو و لە رۆژی 30-11-2019 دەستی لەکار کێشایەوە و رۆژی دواتر پەرلەمانی وڵاتەکەی دەست لەکار کێشانەوەکەی قبوڵ کرد.

دەست لەکار کێشانەوەی عەبدولمەهدی لەسەر داوای مەرجەعی باڵای شیعەکانی عێراق و دوای پەرەسەندنی خۆپیشاندانەکانی وڵاتەکەی، هات.

خۆپیشاندانەکان لە رۆژی 2-10-2019ـەوە لە بەغدا و زۆربەی شارەکانی عێراق دژی گەندەڵی و نەبوونی خزمەتگوزاری، دەستیان پێ کرد.

بەهۆی خۆپیشاندانەکان و کەوتنەوەی توندوتیژی تێیاندا، زیاتر لە 400 هاووڵاتی و کارمەندی ئەمنی گیانیان لەدەست داوە و زیاتر لە 16 هەزاری دیکەش بریندار بوون، جگە لە کەمئەندامبوونی 700 کەس و ژمارەکانیش بەردەوام لە بەرزبوونەوە دان.













باسنيوز