'دانانی سەرۆکوەزیرانێکی نوێ بۆ عێراق ئاسان نابێت'
دەستنیشانکردنی سەرۆکوەزیرانێکی نوێ بۆ عێراق ئاسان نابێت، هێشتا ناوێک نییە کە جێگرەوەی عەبدولمەهدی بێت، دیاریش نییە ئەو سەرۆکوەزیرەی دابێ بە دڵی کێ دەبێت و ڕەزایەتی کێی لەسەر دەبێت.
سەرۆکوەزیرانێکی نوێ...
ناوێکی ناسراو و دیار نییە، بەڵام گفتوگۆی ژێربەژێر هەن، هەر گرووپ و لایەنێک دەیانەوێت پێگە و نفووزی خۆیان لە عێراق بەهێزتر بکەن و بەشێک لە سیاسەتڤانان پێیان وایە، سەرۆکوەزیرانی عێراق لە عێراق دانانریت و خۆپێشاندەرانیش ئەمە قبووڵ ناکەن.
بەیار دۆسکی گوتی: "دوای دەستلەکارکێشانەوەی عەبدولمەهدی قەیرانێك لە نێوان لایەنەکانی عێراقدا پەیدا بووە، ئەویش بێباوەڕی بە یەکترییە، ئێستاش هەردوو بەرەکانی "چاکسازی و بینا" هاوکاریی یەکتر نەکەن، قورسە سەرۆکوەزیرێکی نوێ دەستنیشان بکرێت و ئەگەر نیەتی چاک و بەرژەوەندیی گشتیی خەڵکی عێراق لەبەرچاو نەگرێت، ئەوا زۆر قورسە کەسیك دابنرێت، بەڵام تا ئێستا لە عێراقدا ئەمە نەبووە."
ناوبراو ئاماژەیشی دا: "پێ دەچیت کۆتاییی ئەم هەفتەیە کەسێک ڕابگەیەنرێت، کە کەسیكی سەربەخۆیە و سەر بە هیچ لایەنێک نییە، بۆ ئەوەی بۆ سەرۆکوەزیرانی عێراق دیاری بکریت، بەڵام بە بۆچونمان هەر کەسێک بێت و کوتلەیەکی پەرلەمانی پشتیوانیی لێ نەکات، وەک عادل عەبدولمەهدی درێژە ناکێشێت."
ئۆکەی خۆپێشاندەران
دوای دەستلەکارکێشانەوەی عەبدولمەهدی، خۆپێشاندەران نەوەستاون و داوای جێبەجێكردنی داواکاریی خۆپێشاندانەکان دەکەن و دەبێ هەموو شتێکی دابێت ڕازیبوونی خۆپێشاندەران و شەقامی عێراقی لەسەر بێت و ئەمە لە داواکارییەکانی شەقامی عێراقییە."
خۆپێشاندەران لە دروشمەکانیاندا دەڵێن، دەبێ دانانی سەرۆکوەزیرانی نوێی عێراق بە ڕەزامەندی و ئۆکەی ئەوان بێت، نەک بە ڕازیبوونی وڵاتانی ''دەرەوە''، دەشبێ سەروسیمایەکی نوێ بێتە سەر دەسەڵات و ئەوانەی پێشووتر قبووڵ ناکەن.
دۆسکی ئاماژەی دا: "یەکێک لەو فاکتەرانەی کە هۆکارە بۆ ئەوەی ئێستا نەتوانن کەسێك بۆ سەرۆکایەتیی حکوومەت هەڵبژێرن، داواکاریی خۆپێشاندەرانە و دەبێ ئەو کەسەی دابێ ڕازیبوونی خۆپێشاندەرانی لەسەر بێت و داوکارییان جێبەجێ بکات."
ئێستا کورد چەند ئامانجی لە دانانی سەرۆکوەزیران هەیە، بەڵام لەسەر ئەو بابەتە تەنیا ئەوەی گووتوە، کە دەبێ سەرۆکوەزیرانی نوێ بەدروستی دەستوور جێبەجێ بکات.
