ڕێکخراوی لێبووردنی نێودەوڵەتی لە نوێترین ئاماری خۆیدا لەبارەی ژمارەی کوژراوەکانی ئەم دوایەی ئێران ئاشکرای کردووە لانیکەم لە سەرتاسەری ئێران 143 کەس کوژراون.

توێژەرانی ڕێکخراوی لێبوردنی نیودەوڵەتی لەو باوەڕە دان کە ژمارەی کوژراوانی خۆپیشاندان و ناڕەزاییەکانی ئێران زیاترە لەو ڕێژەیە و لەسەر ئەو بنەمایەش درێژە بە لێکۆڵینەوە و بەدواداچوونەکانیان دەدەن.

ئەو دامەزراوە ناحکوومییە بە بڵاوکردنەوەی ڕاگەیەندراوێک، وێڕای ئیدانەکردنی بەکارهێنانی چەک و هێزی سەرکوت، ئاشکرای کردووە ئەو جۆرە هەڵسوکەوتەی هێزە ئەمنییەکان بووەتە هۆی کوژرانی ئەو ڕێژە زۆرە و ئەمەش کاردانەوەی کۆمەڵگەی نێودەوڵەتیی لێ کەوتەوە.

ڕێکخراوی لێبوردنی نێودەوڵەتی ئەوەی پشتڕاست کردووەتەوە کە بەپێی چەند ڕاپۆرتی باوەڕپێکراو، هەموو کوژراوەکان لە ناوچە جیاجیاکانی ئێران، بەهۆی دەستڕێژی گوللەوە بووە و تەنیا یەک کەسیان بەهۆی گازی فرمێسکڕێژەوە گیانی لەدەست داوە و کەسێکی دیکەش بەهۆی لێدانی و ئەشکەنجەی زۆر و ئەوانی دیکە بە گوللە کوژراون.

بەپێی زانیاریی سەرچاوەکانی مافی مرۆڤ زیاتر لە 40 کەس لەو کوژراوانە لە شارەکانی ڕۆژهەڵاتی کوردستان بوون هاوکات بە سەدان کەسیش دەستگیر کراون و بەپێی دوایین ئامارەکان لە سەرتاسەری ئێران زیاتر لە چوار هەزار و 800 کەس دەستگیر کراون و بە سەدان کەسیش بریندار بوون.

لە هەفتەی ڕابردووەوە بۆ ماوەی چوار بەهۆی گرانبوونی بەهای بەنزین، خۆپیشاندان و ناڕەزییەکی فراوان سەرتاسەری ئیران و ڕۆژهەڵاتی کوردستانی گرتەوە و ئەمەش بەهوی ئاڵۆزی و بە سەدان بانک و ناوەندی ئەمنی سووتێندران و حکوومەتی ئێرانیش بە پچڕانی ئینتەرنێت، خێرا خۆپیشاندانەکانی کۆنترۆڵ کرد و وێرای زیانی گیانی بە بە سەدان ملیۆن دۆلار زیانی ئابووری بەر کەرتی بانک، بینا حکوومییەکان و ئابووریی ئەو وڵاتە کەوت.





باسنيووز