گوتەبێژی نووسینگەی عادل عەبدولمەهدی، سەرۆک وەزیرانی عێراقی فیدرال هەموارە پێشنیازکراوەکانی یاسای هەڵبژاردنەکانی عێراقی ئاشکرا کرد و ڕای گەیاند کە خاوەنی دەیان جۆرە پۆست بەپێی هەموارەکە ناتوانن خۆیان کاندید بکەن.

سەعد حەدیسی، گوتەبێژی نووسینگەی عەبدولمەهدی لە لێدوانێکی ڕۆژنامەوانیدا ناوەڕۆکی پڕۆژەیاسای نوێی هەڵبژاردنی عێراقی ئاشکرا کرد و رای گەیاند کە بەپێی پڕۆژەیاساکە، کۆمەڵێک گۆڕانکاری دەکرێن کە بەشێکیان لەم خاڵانەدا ڕوون کراونەتەوە:

- ئەو کەسەی خۆی دەپاڵێوێت، لە کاتی خۆپاڵاوتنەکەدا ٢٥ ساڵیی تەمەنی تەواو کردبێت.


- ئەو کەسانەی ئەم پۆستانەیان هەیە، بۆیان نییە لە هەڵبژاردنەکاندا خۆیان بپاڵێون:

١- سەرۆک کۆمار و جێگرەکانی

٢- سەرۆک وەزیران و جێگرەکانی

٣- وەزیرەکان و وەکیلی وەزارەتەکان

٤- سەرۆکی دەستە سەربەخۆکان و جێگرەکانیان

٥- سەرۆکی دامەزراوە نەبەستراوەکان بە وەزارەتەکان و جێگرەکانیان.

٦- راوێژکارەکان

٧- پارێزگارەکان و جێگرەکانیان.

٨- سەرۆک و ئەندامانی ئەنجومەنی پارێزگاکان

٩- خاوەن پلە تایبەتەکان

١٠- بەڕێوەبەرە گشتییەکان



- لە دەسەڵاتی دادوەریشدا ئەم کەسانە ناتوانن خۆیان بپاڵێون:

١- دادوەرەکان

٢- ئەندامانی داواکاری گشتی



- هیچ کەسێک لە ئەندامانی هێزە ئەمنییەکان ناتوانن خۆیان بپاڵێون.



- ئەندامانی ئەنجومەنی کۆمسیاران و ئەوانەی پۆستی باڵایان لە کۆمسیۆنی باڵای هەڵبژاردنەکان و فەرمانبەرانی کۆمسیۆن ناتوانن خۆیان کاندید بکەن.



- ئەو کەسانەی بە لیستی تاکلایەنە دەچنە نێو هەڵبژاردنەکان، لە دانانی بڕە پارەی تەئمیناتی بەشداریکردن لە هەڵبژاردن دەبەخشرێن.



- ئەنجومەنی نوێنەرانی عێراق لە ٢٥١ پەرلەمانتار پێک دێن کە ٥ پەرلەمانتاری کۆتای مەسیحی، ١ سابیئە، ١ ئێزدی، ١ کوردی فەیلی و ١ی شەبەک دەبێت.



- ئاوارەکان دەتوانن لەو شوێنانەی لێی نیشتەجێن دەنگ بدەن، بەڵام دەنگەکەیان بۆ بازنە ئەسڵییەکەی هەڵبژاردن دەچێت، واتە ئەو پارێزگایەی کە لێیەوە بووە.



- پرۆسەی پەنجەمۆر بۆ دەنگدانی گشتی و تایبەت ئەنجام دەدرێت.



- لە دوای دەنگدانی تایبەت، کارتی دەنگدان لە دەنگدەر وەردەگیرێتەوە، دواتریش لە ڕێگەی یەکە سەربازییەکانیان کارتەکانیان بۆ دەگەڕێندرێتەوە.



- هیچ پەرلەمانتار، حزب و کوتلەیەکی تۆمارکراو لە چوارچێوەی لیستە کراوە براوەکانی هەڵبژاردن، بۆیان نییە بچنە نێو هیچ هاوپەیمانی و حزب و لیستێکی دیکەوە، تاوەکوو حکوومەت پێک دەهێندرێت.



- رێگە نادرێت هیچ پاڵێوراوێکی براوە لە هەڵبژاردندا بۆ پۆستێک بە پلەی وەزیر لەو خولەی هەڵبژاردن کە تێیدا براوە بووە، کاندید بکرێت.



- عێراق لەسەر ئاستی پارێزگاکاندا بۆ ١٨ بنکەی هەڵبژاردن دابەش کراوە.











باسنيوز