خۆپیشاندەرانی عێراق لە چەند ناوچەیەکدا مانگرتنی گشتی رادەگەیەنن.

هەفتەی رابردوو موقتەدا سەدر، رێبەری رەوتی سەدر داوای لە خۆپیشاندەران کرد بۆ ماوەی رۆژێک مانگرتنی گشتی رابگەیەنن.

خۆپیشاندەرانی پارێزگاکانی دیوانییە، زیقار و میسان رایانگەیاندووە، کە ئەمڕۆ یەکشەممە 17-11-2019 هەموو فەرمانگەکانی حکوومەت لە شارەکانیان دادەخرێن و لەسەر دەرگاکانیان دروشمی (داخراوە بە فەرمانی میللەت) دەنووسرێ.

وەک پاڵپشتییەک بۆ خۆپیشاندەران، سەندیکای گشتیی کرێکارانی نەوت و گاز رایگەیاندووە، ئەمڕۆ یەکشەممە مان دەگرن.

خۆپیشاندانەکان لە رۆژی 2-10-2019ـەوە لە بەغدا و زۆربەی شارەکانی عێراق دژی گەندەڵی و نەبوونی خزمەتگوزاری، دەستیان پێ کردووە.

بەهۆی خۆپیشاندانەکان و کەوتنەوەی توندوتیژی تێیاندا، زیاتر لە 300 هاووڵاتی و کارمەندی ئەمنی گیانیان لەدەست داوە و زیاتر لە 16 هەزاری دیکەش بریندار بوون، جگە لە کەمئەندامبوونی 700 کەس.




باسنيوز