بەپێی زانیاریی ماڵپەڕی فەرمیی عێراق، هێزە ئەمنییەکانی عێراق لە ئەنجامی ئۆپەراسیۆنێکی دژە تیرۆردا لە باشووری پارێزگای نەینەوا 14 چەکداری داعشیان کوشتووە.

ماڵپەڕی فەرمیی عێراق (واع) لەمبارەوە بڵاوی کردووەتەوە، هێزەکانی دژە تیرۆری عێراقی ئەمڕۆ دووشەممە 2019.11.11 لە ئۆپەراسیۆنێکدا توانیویانە 14 چەکداری داعش بکوژن.

ئەو ئۆپەراسیۆنە لە باشووری پارێزگای نەینەوا بووە و چەند سەرچاوەیەکی دیکە باسیان لەوە کردووە کە 13 چەکداری دیکەی داعش دەستگیر کراون.

حەیدەر عەبادی سەرۆک وەزیرانی پێشووی عێراق کۆتایی ساڵی 2017 ڕای گەیاند داعش لە عێراق کۆتایی هاتووە، بەڵام هێشتا لە پارێزگاکانی نەینەوا، کەرکووک، سەلاحەدین و دیالە چەکدارانی داعش جموجۆڵیان هەیە و خەریکی خۆڕێکخستنەوەن و ناو بەناو تەقینەوە دەکەن و هێرش دەکەن سەر خەڵک و هێزە ئەمنییەکان و هێشتا وەک مەترسییەک لە عێراق ماون.












باسنيوز