خۆپیشاندەرانی عێراق فەرمانگەیەکی گرنگی حکوومەتی وڵاتەکەیان لە بەغدای پایتەخت، دەسووتێنن.

لیوا عەبدولکەریم خەلەف، گوتەبێژی فەرماندەی فەرماندەیی هێزە چەکدارەکانی عێراق بە کەناڵی فەرمیی وڵاتەکەی راگەیاندووە، رۆژی یەکشەممە 10-11-2019، خۆپیشاندەران فەرمانگەی دادی ناوچەی بابول شەرقیی بەغدایان سووتاند.

لیوا عەبدولکەریم خەلەف هەروەها رایگەیاندووە، ”هەندێک تاوانبار“ هەوڵیان داوە رێگریی لە چوونی تیمی بەرگریی شارستانی بۆ کوژاندنەوەی ئاگرەکە، بکەن.

لە رۆژی 2-10-2019ـەوە، هاووڵاتییانی عێراق لە بەغدا و زۆربەی شارەکانی ئەو وڵاتە دەستیان بە خۆپیشاندان دژی گەندەڵی و نەبوونی خزمەتگوزاری کردووە.

بەهۆی خۆپیشاندانەکان و کەوتنەوەی توندوتیژی تێیاندا، زیاتر لە 300 هاووڵاتی و کارمەندی ئەمنی گیانیان لەدەست داوە و زیاتر لە 15 هەزاری دیکەش بریندار بوون.








باسنيوز