چاودێرێكی سیاسی: هه‌موو لایه‌نه‌كان پشتگیریی خۆیان بۆ بەردەوامبوونی حكوومه‌تی ئێستا ده‌ربڕیوه
چاودێری سیاسی و ماموستای زانكۆ، د. بوخاری عه‌بدوڵڵا گوتی: "ئه‌و داواكارییه‌ی ده‌كرێت بۆ گۆڕینی ده‌سه‌ڵاتی عێراق گۆڕینێكی جددی نییه و له جێی خۆیدا نییه، چونكه ئه‌گه‌ر ئه‌و كاره بكرێت، پێویسته هه‌رسێ سه‌رۆكایه‌تییەکە نه‌مێنێت و ئه‌وكاتیش فه‌وزا پەیدا ده‌بێت و بۆشاییه‌كی ده‌ستووریی لێ دەکەوێتەوە، بۆیه هه‌موو لایه‌نه‌كانی نێو حكوومه‌ت و ئه‌وانه‌ی دیكەش پشتگیری له عادل عه‌بدولمه‌هدی ده‌كه‌ن بۆ ئەوەی له ده‌سه‌ڵات به‌رده‌وام بێت و داواكاریی خۆپێشانده‌رانیش جێبه‌جێ بكرێت، بۆیه هه‌موو لایه‌ك كۆكن لەسەر ئەوەی کە حكوومه‌ت بمێنێت."
د. بوخاری عه‌بدوڵڵا گوتیشی: "هۆكاری سه‌ره‌كیی خۆپێشاندانه‌كان ئه‌وه‌یه له ماوه‌ی 15 ساڵی ڕابردوودا هیچ بۆ عێراقییه‌كان نه‌كراوه و عێراق پڕ بووه له گه‌نده‌ڵی، ئه‌مه له لایه‌ك و له لایه‌كی دیكەوە ده‌ستی دره‌كی و هه‌ندێك لایه‌نی سیاسی له‌پشت ئه‌و خۆپێشاندانەوەن، به‌ڵام ئه‌و لایه‌نانه ترساون كه ئه‌م دۆخه‌ی هه‌یه مه‌ترسیداره و پشتگیری له سه‌رۆكوه‌زیران ده‌كه‌ن، کە داواكارییه‌كانی خۆپێشاندەران جێبه‌جێ بكرێت و حكوومه‌ت به‌رده‌وام بێت."
په‌رله‌مانتاری پارتی دیموكراتی كوردستان، به‌یار دۆسكی ڕاگه‌یاند: "ئه‌گه‌ر خۆپێشانده‌ران مه‌به‌ستیان بێت داواكارییە ڕەواکانیان جێبه‌جێ بكرێت، حكوومه‌ت ئاماده‌یه جێبه‌جێیان بكات و پڕۆژه‌یه‌كیشی ئاماده كردووه بۆ جێبه‌جێكردنی داواكارییه‌كانیان، به‌ڵام ئه‌گه‌ر بۆ مه‌به‌ستی دیكه بێت، زۆر زه‌حمه‌ته."
دۆسكی باسی له‌وه‌ش كرد: "ئه‌گه‌ر خۆپێشانده‌ران مه‌به‌ستیان گۆڕینی سیسته‌می سیاسی بێت، دۆخه‌كه به‌و شێوەیە به‌رده‌وام ده‌بێت و چاره‌سه‌ركردنی زۆر زه‌حمه‌ت ده‌بێت، چونكه هه‌موو لایه‌نه‌كان له‌گه‌ڵ به‌رده‌وامبوونی حكوومه‌تی ئێستادان."
