لە دانیشتنی ئەمڕۆی پەرلەمانی عێراقدا ژمارەیەک بڕیاردران، یەکێک لە بڕیارەکان هەڵوەشانەوەی ئەنجوومەنی پارێزگاکانە، کە حاڵەتێكی تایبەت بە پارێزگای کەرکووك دراوە و پەرلەمانتارانی پارێزگاكە كارەكانی ئەنجوومەنی پارێزگای کەرکووک راییدەكەن.

بڕیارەکانی پەرلەمانی عێراق بریتین لە:

- هەڵوەشانەوەی ئەنجوومەنی پارێزگاکان، حاڵەتێكی تایبەت بە پارێزگای کەرکووك دراوە و پەرلەمانتارانی پارێزگاكە كارەكانی ئەنجوومەنی پارێزگای کەرکووک راییدەكەن.

- پەرلەمان چاودێری و سەرپەرشتی کارەکانی پارێزگارەکان دەکات تاوەکو ئەنجامدانی هەڵبژاردن.

- هەڵوەشانەوەی سەرجەم ئیمتیازات و دەرماڵەی هەرسێ سەرۆکایەتییەکە، پەرلەمانتاران، گەورە بەرپرسان، راوێژکاران، بریکار، وەزیر و بەڕێوەبەرە گشتییەکان.

- هەڵوەشانەوەی ئیمتیازاتی دەستە سەربەخۆکان، دەسەڵاتی دادوەری، دەستەی دەستپاکی، دادگای فیدراڵی، ئەنجوومەنی باڵای دادوەری، پارێزگارەکان، ئەوانەی هەمان پلەیان هەیە و بڕیارەکە لە ئەمڕۆ دووشەممەوە جێبەجێدەکرێت.

- لیژنەیەك بۆ هەمواركردنەوەی دەستووری عێراق پێکهێنرا و سێ کەسیان کوردن کە بریتین لە ڤيان سەبری، جوان ئیحسان و یوسف محەممەد سادق.

- پەسەندکردنی ناوی سەرۆک و جێگر و ئەندامانی ئەنجوومەنی خزمەتی فیدراڵی کە بریتین لە:

مەحموود محەممەد تەمیمی، سەرۆکی ئەنجوومەنی خزمەت
لەمیا خالیدی، جێگری سەرۆکی ئەنجوومەنی خزمەت.

ئەندامانی ئەنجوومەکە بریتین لە :

سەباح نووری مەحیاوی، ئەسما شاکر عاشوور، ئیلهام لەتیف شاکر، فرەنسیس ئەورها جنو، ئەحمەد موحسین حەمیدی، ئەحمەد هاشم عەقابی، محەممەد عەبدولحوسێن ساحب، جوان ئەحمەد و عارف ساڵح دلێمی .

- وەزیری تەندروستی سوێندیی دەستووری خوارد

-خوێندنەوە بۆ پرۆژەیاسای ئەنجوومەنی ئاوەدانکردنەوە کرا