بڕیارە پەرلەمانی عێراق دانیشتنێک بۆ تاوتوێکردنی بارودۆخی وڵاتەکە دوای خۆپیشاندانەکان بکات، بەڵام 299 پەرلەمانتار ئامادەی دانیشتنی ئەمڕۆی پەرلەمان نابن.

بەپێی هەواڵێکی میدیا عێراقییەکان، تەنیا 30 پەرلەمانتار لەکۆی 329 پەرلەمانتاری عێراق، ئامادەی دانیشتنەکەی ئەمڕۆ شەممە 26-10-2019، بوون.

بڕیار بوو لە دانیشتنەکەدا، چاو بە داواکاریی خۆپیشاندەران بخشێندرێتەوە و بڕیارەکانی ئەنجومەنی وەزیرانی عێراق لەبارەی چاکسازی، تاوتوێ بکرێن.

بەشێک لە سەرچاوەکان باس لەوە دەکەن، کە زۆرینەی بەرپرس و پەرلەمانتارانی عێراق لە ترسی فراوانبوونی خۆپیشاندانەکەی رۆژی هەینی، وڵاتەکەیان بەجێ هێشتووە، بەڵام هیچ سەرچاوەیەکی فەرمی ئەو زانیارییەی پشتڕاست نەکردووەتەوە.

رۆژی هەینی 25-10-2019، سەدان هەزار هاووڵاتیی عێراق لە بەغدا و شارەکانی دیکەی باشووری ئەو وڵاتە، دژی گەندەڵی و کەمیی خزمەتگوزاری، خۆپیشاندانیان ئەنجام دا.

بەپێی دوایین زانیاری، بەهۆی توندوتیژیی سوپا و هێزە ئەمنییەکان دژی خۆپیشاندەرانەوە، 42 خۆپیشاندەر لە شارەکانی بەغدا، کەربەلا، بابل، میسان، زیقار، بەسرە، واست و دیوانییە کوژراون و 2300ی دیکەش بریندار بوون.













باسنيوز