کۆمسیۆنی مافەکانی مرۆڤی عێراق رایگەیاند، لە خۆپیشاندانەکانی دوێنێی بەغدا و شارەکانی ناوەڕاست و خواروی عێراق 30 کەس لە خۆپیشاندەران و هێزە ئەمنییەکان کوژران و زیاتر لە دو هەزار کەسیش برینداربون.

بە گوێرەی راگەیەنراوەکەی کۆمسیۆنی مافەکانی مرۆڤ لە بەغدا 8 کەس، لە میسان 9 کەس، لە زیقار 9 کەس، کە بەسرە 3 کەس و لە موسەناش کەسێک کوژراوە.

باس لەوەشکراوە، لە خۆپیشاندانەکانی دوێنێدا دو هەزار و 312 کەس لە 8 پارێزگای عێراقدا برینداربون کە زۆرترینیان لە خۆپیشاندەرانی بەغدا بون، کە ژمارەیان هەزار و 493 کەس بوە.

کۆمسیۆنی مافەکانی مرۆڤ ئەوەشی خستوەتەڕو، لە 24 کاتژمێری رابردودا زیاتر لە 50 بارەگای هێزە ئەمنییەکان و بارەگا حکومییەکان و بارەگای پارتە سیاسییەکان لە میسان، واست، زیقار، بەسرە و موسەنا سوتێنراوە.

کۆمسیۆنەکە داواش لە خۆپیشاندەران دەکات پارێزگاری لە بە ئاشتی هێشتنەوەی خۆپیشاندانەکان و پارێزگاری لە موڵکی گشتی بکەن و هێزە ئەمنییەکانیش پێویستە پارێزگاری لە گیانی خۆپیشاندەران بکەن.








خەندان