پەرلەمانی عێراق ژمارەیەک بڕیاری لەبارەی داواکارییەکانی خۆپیشاندەران پەسەندکرد
د. میران محەممەد، ئەندامی پەرلەمانی عێراق لە لێدوانێکدا رایگەیاند: لە دانیشتنەکەدا 20 بڕگە و بڕیار دەنگیان لەسەر درا و پەسندکراون کە داواکاری خۆپیشاندەران بوون، دیارترین ئەو بڕیارانەش بریتی بوون لە:
- هەڵوەشانەوەی پشکێنەرە گشتییەکان، کە چاودێری کاروباری وەزارەتەکانیان دەکرد، لەسەرجەم وەزارەت و دام و دەزگاکان.
- سڕکردنی کارەکانی ئەنجوومەنی پارێزگاکان، بەڵام ئەوە هەنگاو بە هەنگاو دەکرێت و پێویستی هەموارکردن و دەرکردنی یاسا هەیە.
- کوژراوانی خۆپیشاندانەکان بە شەهید هەژماردەکرێن و قەرەبوو دەکرێنەوە.
- دروستکردنی سندووقێک بۆ قوتابیان و خستنەسەرکاری بێکاران لە بودجەی 2020 و بڕینی بەشێک لە مووچەی پلە باڵاکان.
- بڕینەوەی مووچە بۆ هەژاران.
- گەڕانەوەی ئەوانەی لە ریزەکانی هێزە ئەمنییەکان گرێبەستەکانیان هەڵوەشاوەتەوە لە وەزارەتەکانی بەرگری و ناوخۆ و دژە تیرۆر.
- گەڕانەوەی فەرمانبەرانی دەستەی پیشەسازی سەربازی بۆ سەرکارەکانیان ئەوانەی یاسای لێپرسینەوە و دادپەروەری نایانگرێتەوە.
- راگرتنی پرۆسەی لابردنی زێدەڕۆییەکان.
- دروستکردنی 100 هەزار یەکەی نیشتەجێبوون بۆ هەژاران و ئەوانەی داهاتیان مامناوەندە.
- لێخۆشبوونی جووتیاران لە کرێی زەوییە کشتوکاڵییەکانیان.
- دانانی بەرنامەیەک بۆ دامەزراندن و جێگرکردنی ئەوانەی گرێبەستن لە فەرمانگەکان.
- دامەزراندنی خاوەن بڕوانامە باڵاکان.
- پێدانی بڕەپارەیەک بە ئەوانەی کەسوکاریان ون و بێسەرشوێن بوونە لەکاتی داعش دا و یاسای شەهیدان بیانگرێتەوە.
- تەرخانکردنی پارەیەک لە بودجەی 2020 بۆ ئارامی و سەقامگیری ناوچە رزگارکراوەکان.
- پێدانی قەرز بە پرۆژە پیشەسازییەکان بۆ خستنەگەڕی کارگە لەکارکەوتووەکان.
- پێداچوونەوە بە مووچەی خانەشینی و لەوبارەوە حکومەت پرۆژە یاسایەک رەوانەی پەرلەمان بکات.
د. میران محەممەد، ئاماژەی بەوەشکرد جگە لە فراکسیۆنی سائیروون نەبێت، زۆربەی فراکسیۆن و کوتلە سیاسییەکانی دیکە ئامادەی دانیشتنەکە بوون بە فراکسیۆنە کوردستانییەکانیشەوە دەنگیان بۆ ئەو بڕیارانە دا.
