سەرۆک وەزیرانی عێراق رایگەیاند، داوا لە هێزە سیاسییە گەورەکانی عێراق دەکات لەنێوان خۆیاندا هاوکاری بن و هاوکاری حکومەت بکەن بۆ فەراهەمکردنی سەرجەم مەرجەکانی چاکسازیی و پێویستییەکان وەک ئەوەی مەرجەعی باڵای پێشکەشیدەکات.

جارێکی دیکە مەرجەعی باڵای ئایینی دەریخست کە گەرەنتی ئاسایش و رێگەی رۆشنکەرە و داڕێژەرەی رێگەی رێنمونییە لە رۆژانی سەختی و ناخۆشییەکاندا


عادل عەبدولمەهدی، سەرۆک وەزیرانی عێراق لەبەیاننامەیەکدا رایگەیاند، "جارێکی دیکە مەرجەعی باڵای ئایینی دەریخست کە گەرەنتی ئاسایش و رێگەی رۆشنکەرە و داڕێژەرەی رێگەی رێنمونییە لە رۆژانی سەختی و ناخۆشییەکاندا، گەلی عێراق و هەمو جیهان گوێی لە دەقی وتاری نوسراوی نوێژی هەینی بو کە هەڵوێستی خۆی لەبارەی ئەو روداوانە دەربڕی کە بە داخەوە وڵات پێیدا تێدەپەڕێت".

ئاماژەی بەوەشکردوە، "مەرجەعییەت پەلاماردانی گیان و موڵک و ماڵی گشتی و تایبەتی و بۆ سەر خۆپیشاندەران و هێزە ئەمنییەکان و توندوتیژی و کردەوەی تێکدەرانەی رەتکردەوە و ئیدانەی کرد".

حکومەت هەوڵەکانی خۆشی دەخاتەگەڕ بۆ سوککردنی کۆژانەکانی هاوڵاتیان و باشترکردنی خزمەتگوزارییەکان و رەخساندنی هەلیکی کار بۆ بێکاران و دوورخستنەوەی خزم خزمێنە


سەرۆک وەزیرانی عێراق دەشڵێت، حکومەت بە هەموو دامەزراوەکانییەوە پابەندە لە بەردەم خوای گەورە و مەرجەعییەتی باڵا و گەلی عێراق کە پابەندە بە راپەڕاندن و ئەنجامدانی ئەرکەکانی و پێشکەشکردنی بەرنامەیەکی پراکتیکی و تەواوی هەوڵەکانی خۆشی دەخاتەگەڕ بۆ سوککردنی کۆژانەکانی هاوڵاتیان و باشترکردنی خزمەتگوزارییەکان و رەخساندنی هەلیکی کار بۆ بێکاران و دوورخستنەوەی خزم خزمێنە لە دامەزراندن و تەواوکردنی دۆسیەی ئەوانەی تۆمەتبارن بەوەی یارییان بە موڵکی گشتی کردووە و دەستیان بەسەرداگرتووە بۆ ئەوەی بدرێنە دادگا.

عەبدولمەهدی داواشی لە هەردو دەسەڵاتی یاسادان و دادوەری کرد کاری هاوبەش و هاوکار و هاوئاهەنگ بن لە هەمو پسپۆری و دەسەڵاتەکانی بۆ جێبەجێکردنی بەرنامەی و پلانی پێویست لە چوارچێوەی خشتەیەکی کاتی رون، بەمەبەستی ئەنجامدانی چاکسازیی پێویست.




خەندان