وەزارەتی دەرەوەی تورکیا داوا لە هاووڵاتییانی وڵاتەکەی دەکات سەردانی عێراق نەکەن.

لە بەیاننامەیەکدا، وەزارەتی دەرەوەی تورکیا ”رێنموونی“ی هاووڵاتییانیوڵاتەکەی دەکات خۆیان لە گەشتکردن بۆ بەغدا و ئەو شارانەی دیکەی عێراق بپارێزن، کە خۆپیشاندان و توندوتیژییان تێدا رووداوە.

وەزارەتەکە ئامۆژگاریی ئەو هاووڵاتییانەی تورکیاشی کردووە، کە ئێستا لە عێراق دەژین، ئاگاداری خۆیان بن و لە ناوچە قەرەباڵغەکان دوور بکەونەوە.

هەر لە بەیاننامەکەدا، وەزارەتی دەرەوەی تورکیا چەند ژمارەیەکی تەلەفۆنی باڵیۆزخانە و کونسوڵخانەکانی وڵاتەکەی لە عێراق بڵاو کردووەتەوە و داوای لە هاووڵاتییانی کردووە لەکاتی پێویست، پەیوەندیی بە بەرپرسانی وڵاتەکەیانەوە بکەن.

لە رۆژە 1-10-2019ـەوە، بەهۆی خۆپیشاندانی هاووڵاتییان لە بەغدا و شارەکانی دیکە، بارودۆخی عێراق تێک چووە و عادل عەبدولمەهدی، سەرۆک وەزیرانی عێراقیش قەدەغەی هاتوچۆی لە بەغدا لە کاتژمێر 5ـی بەرەبەیانی ئەمڕۆ تا کاتێکی نادیار، راگەیاندووە.






باسنيوز