سەرۆک وەزیرانی عێراق بە سەردانێکی فەرمی بەرەو کۆماری چینی میللی، بەڕێ کەوت.


بەپێی بەیاننامەیەکی نووسینگەی عادل عەبدولمەدی، سەرۆک وەزیرانی عێراق، درەنگانی شەوی چوارشەممە 18-9-2019، عەبدولمەهدی عێراقی بەجێ هێشت.

عادل عەبدولمەهدی بە سەرۆکایەتیی شاندێکی باڵای وڵاتەکەی و لەسەر بانگهێشتی فەرمیی سەرۆک وەزیرانی چین، سەردانی ئەو وڵاتە دەکات.

بەپێی زانیارییەکان، سەرۆک وەزیرانی عێراق ژماریەک گرێبەست و رێککەوتن لەگەڵ کۆمپانیا چینییەکان بۆ بونیاتنانەوەی ژێرخانی وڵاتەکەی، دەکات.

لەو سەردانەیدا، 31 بەرپرس یاوەریی عادل عەبدولمەهدی دەکەن، کە ژمارەیەک بەرپرسی کوردیش لەناو شاندەکە دان.

ناوی ئەو وەزیر و بەرپرسە کوردانەی یاوەریی عادل عەبدولمەهدی دەکەن:

- فوئاد حوسێن، جێگری سەرۆک وەزیران بۆ کاروباری ئابووری و وەزیری دارایی عێراق

- بەنگین رێکانی، وەزیری ئاوەدانکردەنەوەی عێراق

- ئەحمەد بەرواری، باڵیۆزی عێراق لە چین

- فرسەت سۆفی، پارێزگاری هەولێر

- هەوڤاڵ ئەبوبەکر، پارێزگاری سلێمانی

- فەرهاد ئەتروشی، پارێزگاری دهۆک

پێشتر فارس عیسا، نواینەری حکوومەتی هەرێمی کوردستان لە بەغدا، راگەیاندبوو، کە سێ پارێزگارەکەی هەرێمی کوردستان بە نوێنەرایەتیی هەرێمی کوردستان گفتوگۆ و دانوستاندن لەگەڵ کۆمپانیا چینییەکان دەکەن.








باسنيوز