وەزیری دەرەوەی ئەمریکا بە تەلەفۆن پەیوەندیی بە سەرۆک وەزیرانی عێراقەوە دەکات و تاوتوێی هێرشەکانی سەر سعودیە دەکات.

ئاژانسی (رۆیتەرز) بڵاوی کردووەتەوە، کە ئەمڕۆ دووشەممە 16-9-2019، مایک پۆمپیۆ، وەزیری دەرەوەی ئەمریکا بە تەلەفۆن پەیوەندیی بە عادل عەبدولمەهدی، سەرۆک وەزیرانی عێراقەوە کردووە.

لەو پەیوەندییەدا، تاوتوێی هێرشەکانی سەر کۆمپانیای ئارامکۆی سعودی کراوە، کە دەنگۆی ئەوە هەیە، هێرشەکان بە فڕۆکەی بێ فڕۆکەوان لە عێراقەوە ئەنجام درابن.

پێشتر بەرپرسانی باڵای ئەمریکا ئاماژەیان بوە کردبوو، کە هێرشەکان لە عێراقەوە ئەنجام دراون، بەڵام نووسینگەی راگەیاندنی ئەنجومەنی وەزیرانی عێراق رەتی کردووەتەوە خاکی وڵاتەکەی بۆ هێرشکردنە سەر سعودیە بەکار هاتبێت.

بەرەبەیانی رۆژی شەممە 14-9-2019، ژمارەیەک فڕۆکەی بێ فڕۆکەوان دوو دامەزراوەی کۆمپانیای ئارامکۆی سعودییان لە شارۆچکەی بەقیق لە رۆژهەڵاتی ئەو وڵاتە، کردە ئامانج.

بەهۆی هێرشی فڕۆکە بێ فڕۆکەوانەکانەوە، دوو تەقینەوە لەو دوو کارگەیە روویان دا و ئاگرێکی گەورە کەوتەوە.






باسنیوز