هێزە عێراقییەکان پێنجەم ئۆپەراسیۆن لە دژی رێکخراوی تیرۆریستی داعش ئەنجام دەدەن.

فەریق روکن عەبدولئەمیر رەشید یاروڵڵا، فەرماندەی ئۆپەراسیۆنە هاوبەشەکان لە عێراق لە بەیاننامەیەکدا رایگەیاندووە، لە بەرەبەیانی ئەمڕۆ دووشەممە 16-9-2019، دەستیان بە ئۆپەراسیۆنی (نەسر 5)، کرد.

ئۆپەراسیۆنەکە بۆ کوشتن و دەستگیرکردنی چەکدارانی داعشە لە ناوچەکانی باشووری رێگای نێودەوڵەتی لەنێوان کەربەلا و نەجەف تا دەگاتە سەر سنووری نێوان عێراق و سعودیە.

ئەو ئۆپەراسیۆنە بە پاڵپشتیی فڕۆکە جەنگییەکانی هاوپەیمانان ئەنجام دەدرێ و میلیشیاکانی حەشدی شەعبیش بەشداریی تێدا دەکەن.

هەرچەندە حکوومەتی عێراق لە کۆتایی ساڵی 2017 کۆتاییهاتنی رێکخراوی تیرۆریستی داعشی راگەیاند، بەڵام چەکدارانی ئەو رێکخراوە تیرۆریستییە بەردەوام لەپارێزگاکانی نەینەوا، دیالە، سەڵاحەدین، ئەنبار و بەغدا کردەی تیرۆریستی ئەنجام دەدەن.

لە مانگی 6ـی 2014، نزیکەی دوو هەزار چەکداری رێکخراوی تیرۆریستی داعش هێرشیان کردە سەر شاری مووسڵ و لە ماوەی چەند رۆژێکدا، هەرەسیان بە سوپای عێراق هێنا و زۆربەی ناوچەکانی پارێزگاکانی نەینەوا، دیالە، سەڵاحەدین و ئەنباریان داگیر کرد.





باسنیوز