پەرلەمانتارێکی کورد لە ئەنجوومەنی نوێنەرانی عێراق ڕایگەیاند وێڕای کورتھێنان لە بودجەی عێراق،بەڵام ناتواندرێت دەستکاری مووچەی فەرمانبەران بکرێت و کەمبکرێتەوە.

شێروان میرزا، ئەندامی لیژنەی دارایی لە ئەنجوومەنی نوێنەرانی عێراق ڕاگەیاند: "ساڵانە لە ئامادەکردنی بودجەی عێراقدا بەھۆی زۆری پێویستییەکانەوە بودجەی عێراق کورت دەھێنێت و پێدەچێت ئەمساڵیش بودجەکە کە لە ئێستادا لە ئامادەکردندایە ئەو کورتھێنانە ڕووبداتەوە".

گوتیشی: "ئەو دەنگۆیانەی باس لە کەمکردنەوەی مووچەی فەرمانبەران دەکەن ڕاست نین،چونکە مووچە بە یاسا ڕێکخراوە و بە یاساش کەمدەکرێتەوە ئەوەش کارێکی ئاسان و سادە نییە".

ئەو پەرلەمانتارە ئاماژەی بۆ ئەوەش کرد کە یاسای موچەی فەرمانبەرانی ھەرێم و عێراق جیاوازە و ئەگەر عێراقیش مەبەستێکی وای ھەبێت لە ھەرێمی کوردستان جێبەجێ ناکرێت.