ئەمشەو پێنجشەممە چەکدارانی رێکخراوی تیرۆریستی داعش لە سنووری پارێزگای دیالە هێرشیان کردە سەر هێزێکی سوپای عێراق و لە ئەنجامدا سەربازێک و کوژراو و ژمارەیەکی دیکەش بریندار بوون.

غالب عه‌تیه‌، گوته‌بێژی پۆلیسی دیاله‌ راگه‌یاند: "پاش كاتژمێر 10ی ئه‌مشه‌و له‌ رێگه‌یه‌كی خاكی گوندێكی سنووری شارۆچكه‌ی بەعقوبه‌ی ناوه‌ندی پارێزگای دیاله‌، چه‌كدارانی داعش هێرشیان كردووەتە سه‌ر سه‌نگه‌ر و خاڵێكی هێزێکی سوپای عێراق".

گوتیشی: "به‌و هۆیه‌وه‌ سه‌ربازێك گیانی له‌ده‌ستداوه‌ و سێ سەرباز و هاووڵاتییەکی سڤیلیش برینداربوون".

ئاماژە بۆ ئەوەش کرد کە دوای گەیشتنی هێزێکی یەدەگی سوپای عێراق بۆ شوێنەکە شەڕ ڕوویداوە و دواتر تیرۆریستەکانی داعش هەڵهاتوون.

سه‌رچاوه‌یه‌ك له‌ بەڕێوەبەرایەتی ته‌ندروستی دیاله‌ ئاشكرای كرد کە ئەو هاووڵاتییە سڤیلەی كه‌ فیشه‌كی به‌ركه‌وتبوو به‌هۆی سه‌ختی برینكه‌یه‌وه‌ گیانی له‌ده‌ستداوه‌.