بەهۆی بڵاوکردنەوەی راپۆرتێک لەبارەی بوونی گەندەڵی لە دامەزراوە ئایینییەکان، دیوانی وەقفی سوننە لە عێراق سکاڵا دژی کەناڵی حورە - عێراق تۆماردەکات.

بڵاوبوونەوەی راپۆرتەکە و دواتر پەخشکردنی پرۆگرامێک لەبارەی گەندەڵی لە هەندێک لە دەزگا و دامەزراوە ئایینییەکانی عێراق کاردانەوەی تووندی بەدوادا هات.

لە راپۆرتەکە و پرۆگرامەکەی کەناڵی حورە - عێراق، ئەمریکا پاڵپشتی دارایی دەکات، ناوی سەرۆکی وەقفی سوننە، موفتی سوننەی عێراق، سەرۆکانی عەتەبەی عەباسی و عەتەبەی حوسەینی شیعە دەهێندرێت و بە تێوەگلان لە گەندەڵی تۆمەتباریان دەکات.

دەستەی حەشدی شەعبی لە راگەیێندراوێکدا ئاماژەی بەوە کردووە "چەند مانگێکە چاودێری گوتاری دوژمنکارانەی چەند کەناڵێکی لۆکاڵی و جیهانی دەکەین کە گەل، باوەڕداران و عێراق دەکەنە ئامانج. پشتگیری هەر رێوشوێنێکی حکومەت دەکەین بۆ دانانی سنوورێک بۆ ئەم پێشێلکارییانە".

محەممەد حەلبووسی، سەرۆکی پەرلەمانی عێراقیش راگەیێندراوێکی لەبارەی کەیسەکەوە بڵاوکردەوە و تێیدا هاتووە "راپۆرتەکە دەزگا و پێگەی مەرجەعە ئایینییەکانی لە عێراق کردە ئامانج و کاتی ئەوە هاتووە دەزگاکانی حکومەت رۆڵی خۆیان بگێڕن بۆ کاراکردنی رێنماییەکانی هەڵسوکەوتی پیشەییانەی رۆژنامەوانی و کۆنترۆڵکردنی گۆڕەپانی راگەیاندن".

کاردانەوەکان هێندە تووندبوون باڵێۆزخانەی ئەمریکایان لە عێراق هێنایە وەڵام. لە راگەیێندراوەکەدا دەڵێت "وەزارەتی دەرەوەی ئەمریکا هیچ دەسەڵاتێکی بەسەر ناوەڕۆکی بەرنامەکانی ئەو کەناڵەدا نییە و عێراقیش مافی خۆیەتی سکاڵا دژی تۆماربکات، ئەگەر پێیوایە کەناڵەکە زانیاری نادروستی بڵاوکردووەتەوە".

وروژاندنی پرسیار لەبارەی رۆڵی پیاوانی ئایینی لە عێراق لە بواری ئابووری و حکومەت و داهاتی مەزارگە ئایینییەکان نوێ نییە، بەڵام هەر جارێک ئەم بابەتە بروژێندرێ کاردانەوەی زۆر تووند بەدوای خۆیدا دەهێنێ.