میلیشیاکانی حەشدی شەعبی رێگری لە هێزێکی سوپای عێراق دەکەن بچێتە ناو شاری مووسڵ.

بەهۆی ئەوەی بڕیاری دەرکردنیان لەناو شاری مووسڵ دراوە، سەرلەبەیانیی ئەمڕۆ دووشەممە 5-8-2019، میلیشیاکانی حەشدی شەعبی لە بازگەی بەرتللە لە دەشتی نەینەوا گردبوونەوەیەکیان ساز کردووە.

بەپێی زانیارییەکان، عادل عەبدولمەهدی، سەرۆک وەزیران و فەرماندەی گشتیی هێزە چەکدارەکانی عێراق بڕیاری داوە تا 24 کاتژمێر، حەشدی شەعبی بارەگاکانی لە دەشتی نەینەوا دابخات.

میلیشیاکان رێگای سەرەکیی نێوان هەولێر و مووسڵیان داخستووە و هاتوچۆی هاووڵاتییانیان راگرتووە.

هێزێکی سوپای عێراق بە مەبەستی کردنەوەی رێگاکە و کۆتایی هێنان بە گردبوونەوەکە، چوونەتە ناوچەکە، بەڵام حەشدی شەعبی، کە ژمارەیەکیان بە جلی مەدەنی وەک هاووڵاتی بۆ پشتگیریی حەشد لەوێ بوون، بە سووتاندنی تایە و دانیشتن لەسەر شەقام، رێگرییان لەو هێزەی سوپای عێراق کردووە.

دوای هەرەسهێنانی سوپای عێراق، زیاتر لە 60 میلیشیا تائیفی لەژێر ناوی حەشدی شەعبی و بە فەتوای ئایەتوڵڵا عەلی سیستانی، مەرجەعی باڵای شیعەکانی عێراق دروست کران.

لە مانگی 6ـی 2014، نزیکەی دوو هەزار چەکداری رێکخراوی تیرۆریستی داعش هێرشیان کردە سەر شاری مووسڵ و لە ماوەی چەند رۆژێکدا، هەرەسیان بە سوپای عێراق هێنا و زۆربەی ناوچەکانی پارێزگاکانی نەینەوا، دیالە، سەڵاحەدین و ئەنباریان داگیر کرد.












باسنيوز