داعش سه‌رۆك هۆزێكی نه‌ینه‌وا و برازاكه‌ی ده‌كوژن
به گوێره‌ی میدیا عێراقییه‌كان، شه‌وی رابردوو، چه‌كدارانی رێكخراوی داعش، هه‌ڵیانكوتاوه‌ته سه‌ر گوندی "ئه‌زوریج"ی باشووری رۆژئاوای مووسڵ و له شه‌ڕ و پێكدادانێكی چه‌كداریدا، له‌گه‌ڵ هۆزی "ساده ئه‌لبوبه‌دران"ی نیشته‌جێی گونده‌كه، سه‌رۆكی هۆزه‌كه به‌ناوی "عه‌لی خزعه‌ل به‌درانی" و برازاكه‌ی به‌ناوی "ئه‌رشه‌د به‌درانی" كوژراون.
میدیا عێراقییه‌كان، ئاماژه به برینداربوونی ژماره‌یه‌ك هاووڵاتی دیكه‌ی نیشته‌جێی گونده‌كه‌ش ده‌كه‌ن.
چه‌كدارانی داعش له سنووره‌كه جموجۆڵیان ده‌ستپێكردووه‌ته‌وه و ماوه‌یه‌كه هه‌ڕه‌شه و مه‌ترسییه‌كانی رێكخراوه‌كه، له رێگه‌ی ئه‌نجامدانی كرده‌وه‌ی تیرۆریستی جۆراو جۆر، كه دیارترینان هه‌ڵكوتانه سه‌ر گونده‌كانه، به روونی ده‌ركه‌وتووه.
به مه‌به‌ستی له‌ناوبردنی ئه‌و چه‌كدارانه و مه‌فره‌زه‌كانی داعش، عێراق ئۆپه‌راسیۆنێكی دیكه‌ی له ناوچه جیاجیاكانی هه‌رسێ پارێزگای سه‌ڵاحه‌ددین، نه‌ینه‌وا و ئه‌نبار ده‌ستپێكردووه.
K24 -
