سه‌رۆك وه‌زیرانی عێراق رایده‌گه‌یه‌نێت، رێگه به‌هیچ گرووپێكی چه‌كدار له‌ ده‌ره‌وه‌ی ده‌سه‌ڵاتی ده‌وڵه‌ت ‌ناده‌ن و زانیاریش لەسەر فەرمانی دەستگیركردنی ژمارەیەك وەزیر و زیاتر لە ھەزار دۆسیەی گەندەڵی دەدات.

له‌ كۆنفرانسی رۆژنامه‌وانی هه‌فتانه‌یدا، عادل عه‌بدولمه‌هدی سه‌رۆك وه‌زیرانی عێراق راشیگەیاند "فه‌رمانی ده‌ستگیركردن بۆ 11 وه‌زیر هه‌یه‌، به‌بێ ئه‌وه‌ی ئاماژه‌ به‌ ناوی وه‌زیره‌كان بكات".

هاوكات له‌ به‌شێكی دیكه‌ی قسه‌كانیدا، سه‌رۆك وه‌زیران عێراق روونیشی كرده‌وه "كه‌ هه‌زارو 267 دۆسیه‌ی گه‌نده‌ڵی ره‌وانه‌ی ده‌سته‌ی ده‌ستپاكی كراون و هه‌روه‌ها چوار هه‌زار و 167 دۆسیه‌‌ی دیكه‌ش هێشتا یه‌كلا نه‌كراونه‌ته‌وه‌".

عادل عەبدولمەھدی ئاماژە بەوەشكرد "پێویستە گرووپەكانی حەشد پابەندی بڕیاری داخستنیان بن و رێگە به ‌هیچ گرووپێكی چه‌كدار له‌ ده‌ره‌وه‌ی ده‌سه‌ڵاتی ده‌وڵه‌ت ‌ناده‌ن".





K24