ئەمڕۆ یەكشەممە موقتەدا سەدر سەرۆكی هاوپەیمانیی (ئەلسائیرون) كە گەورەترین فراكسیۆنی پەرلەمانی عێراقە، داوای لە حكوومەتی بەغدا كرد بە بۆنەی هاتنەوەی مانگی رەمەزان، لێبووردنێكی گشتی بۆ زیندانیان دەربكات.


سەدر ئەمشەو لە هەژماری خۆیدا لە تۆڕی كۆمەڵایەتیی (تویتەر) پۆستێكی بڵاو كردووەتەوە و تێیدا داوای كردووە بە بۆنەی هاتنەوەی مانگی رەمەزان، لێبووردنێكی گشتی بۆ زیندانیان دەربكرێ، بەو مەرجەی لێبووردنەكە تاوانبارانی گەندەڵی و تیرۆریستان نەگرێتەوە.


سەدر نووسیویەتی "ئەم داوای لێبووردنە نابێ ئەو گەندەڵانە بگرێتەوە كە نانی خەڵكیان دزیوە و لەسەر ملی خەڵك دەژین".


هەروەها نووسیویەتی گەندەڵەكان جێی ئومێد نین و پێویستە سزایان بەسەردا بسەپێندرێ، نە تۆبە دەكەن و نە خوداش هیدایەتیان دەدات.


لە كۆتاییشدا دەڵێ لە هەموو ئەو كەسانە دەبوورێت كە خراپەیان دەرهەق خۆی كردووە
bas news -