کەسێکی نزیک و پاسەوانی تایبەتیی سەرۆکی پێشووتری عێراق بە پلەی لیوا خانەنشین کراوە مانگانە زیاتر لە دوو ملیۆن دینار وەردەگرێت.

ماڵپەڕی (مەوازین نیوز)ی عێراقی لە راپۆرتێکدا ئاشکرای کردووە، کە ژمارەیەک بەرپرسی سەربازیی نزیک لە سەدام حوسێنی سەرۆکی لەسێدارەدراوی رژێمی بەعس، لە دوای ساڵی 2003 خانەنشین کراون و مانگانە بڕە پارەیەکی زۆر وەردەگرن.

ماڵپەڕەکە ئاماژەی بەوە کردووە، کە بەڵگەی دەست کەوتووە لەسەر ئەوەی، ئەرشەد یاسین رەشید نەجم ئەلناسری، پاسەوانی تایبەتی و هاوسەری زڕخوشکی سەدام حوسێن، کە ئێستا تەمەنی 71 ساڵە و لە شاری تکریت دەژی، لە ساڵی 2005 بە پلەی لیوا خانەنشین کراوە و مانگانە دوو ملیۆن و 235 هەزار دیناری پێ دەدرێت.

سەدام حوسێن لە ساڵی 1937 لە گوندی عۆجە لە تکریت لەدایک بووە. لە ساڵی 1979 خۆی وەک سەرۆکی عێراق ناساند و تا رووخاندنی رژێمەکەی لە ساڵی 2003، سەرۆکایەتیی ئەو وڵاتەی بەشێوەیەکی زۆر دڕندانە کرد.

سەدام حوسێن، کە لە رۆژی 30-12-2006 لە سێدارە درا، لەگەڵ سەرانی رژێمەکەی (رژێمی بەعس)، هەزاران تاوانی بەرامبەر گەلی کوردستان ئەنجام دا، کە دڕندانەترینیان بریتی بوون لە؛

- کیمیابارانکردنی هەڵەبجە.

- ئەنفالکردنی زیاتر لە 182 هەزار هاووڵاتیی کورد.

- ئەنفالکردنی زیاتر هەشت هەزار بارزانی.

سوتماککردن و وێرانکردنی زیاتر لە چوار هەزار گوندی کوردستان.



دوای رووخاندنی رژێمی بەعس، بەپێی دەستووری هەمیشەیی عێراق لە 2005، حزبی بەعس و سەرانی رژێمەکەی لە کاری سیاسی، ئیداری و سەربازی دوور خرانەوە و قەدەغە کران.