ئەمڕۆ شاری بەسرە ئاڵای خۆی وەک هەرێمێک لە چوارچێوەی کۆماری فیدڕالیی عێراق بەرز دەکاتەوە.

محەمەد تائی، پەرلەمانتاری پێشووی بەسرە و سیاسەتمەداری عێراقی لە هەژماری تایبەتیی خۆی لە تۆڕی کۆمەڵایەتیی (فەیسبووک) رایگەیاندووە، بەرزکردنەوەی ئاڵای بەسرە لەچوارچێوەی دەستووری هەمیشەیی عێراقە.

محەمەد تائی هەروەها رایگەیاندووە، ”بەم نزیکانە“ هەرێمی بەسرە رادەگەیەندرێت و ئەمڕۆ چوارشەممە 20-3-2019ش ئاڵای هەرێمەکە بەرز دەکەنەوە.

پارێزگای بەسرە، کە بە شادەماری ئابووریی عێراق دادەندرێ، لەلایەن حکوومەتی ئەو وڵاتەوە بە تەواوی پشتگوێ خراوە و دانیشتووانەکەی تەنانەت لە ئاوی خواردنەوە بێ بەشن، بۆیە چەند ساڵێکە هەوڵی راگەیاندنی هەرێمی بەسرە دەدەن.

سیاسەتمەدار و کەسایەتییەکانی بەسرە بەردەوام هاوسۆزیی خۆیان لەگەڵ هەرێمی کوردستان دەردەبڕن و باس لەوە دەکەن، کە دەیانەوێ وەک هەرێمێک و هاوشێوەی هەرێمی کوردستان، پارێزگاکەیان ببوژێننەوە و پێویستییە سەرەکییەکانی ژیان بۆ هاووڵاتییانیان دابین بکەن.

بەپێی دەستووری عێراق، ئەگەر زۆرینەی دانیشتووانی هەر پارێزگایەک رایان لەسەر بوو، دەتوانن هەرێمێک بۆ خۆیان دروست بکەن.











باسنيوز