سەرۆک وەزیرانی عێراق ڕایگەیاند، بڕی بەرھەمھێنانی وزەی کارەبا لە وڵات زیادیکردووە، جەختیشی کردەوە، کە کارەبای ئەمساڵ لە ھاوینی ساڵی پار باشتر دەبێت.

عادل عەبدولمەھدی، سەرۆک وەزیرانی فیدڕاڵ لەکاتی سەرۆکایەتیکردنی کۆبوونەوەی دوو قۆڵی دەستەی باڵای ھەماھەنگی پارێزگاکان، داوای ھاریکاری پارێزگاکانی کرد بۆ چارەسەرکردنی کێشەکان و بەردوامیدان بەو پلانانەی، کە ئابووری چالاک دەکەنەوە و بەرژەوەندییە گشتییەکان بەدی دەھێنن.

بەپێی ڕاگەیاندراوێک، ھەر لەو کۆبوونەوەیەدا، عەبدولمەھدی داوای کرد کار بکرێت بۆ دابینکردنی وزەی کارەبا بۆ ھاووڵاتییان و ناوچە ھەژارنشینەکان.

جەختیشی کردەوە، کە لەڕێگەی لیژنەی وزەی حکوومەتەوە بەدواداچوونی بەردەوامی بۆ دۆخی کارەبا ھەیە بۆ ئەوەی بەرھەمھێنان زیاد بکرێت، گوتیشی: "ئاستی بەرھەمێھێنانی وزە دەگاتە ١٨ ھەزار مێگاوات لەگەڵ دابینکردنی پارەی پێویستیش، بەرھەمھێنانی وزە زیاد دەکات، بەم نزیکانەش ١٠ وێستگەی دیکە دەکەونە کار و گرێبەستیش نوێش بۆ پەرەپێدانی وزەی کارەبا کراوە، بۆیە ئەگەر ھەوڵەکان یەک بخەین، لەم ھاوینەدا کارەبا لە ساڵی پار باشتر دەبێت".










باسنيوز