لە خانەقین حەشدی شەعبی هەوڵەکانی بۆ داگیرکردنی زەویی هاووڵاتییان چڕ کردووەتەوە
شێخ جەعفەر مستەفا، بەرپرسی لقی ١٥ی خانەقینی پارتی دیموکراتی کوردستان ڕايگەیاند: "لە دەوروبەری مەندەلی و جەلەولا گرووپی چەکدار دروست بووە و بەردەوام تەقە لە خەڵک دەکەن، کەس نازانێ ئەو گرووپانەش سەر بە کێن؟، جیا لەوەش ئێستا حەشدی شەعبی لەسەر ڕێگای نێوان خانەقین و دیالە خاڵی پشکنین و گومرگیان داناوە و پارە لە ئۆتۆمبێلە بارهەڵگرەکان وەردەگرن، ئیتر بەبێ ئەوەی کە وەسڵیان پێ بدەن، بۆ ئۆتۆمبێلی بارهەڵگری بچووک ١٠٠ دۆلار وەردەگرن و بارهەڵگری گەورەش لە ٢٠٠ دۆلاوەرەوە دەست پێ دەکات".
ئەو بەرپرسەی پارتی ئاشکراشی کرد: "کاتژمێر ٢ی ڕۆژی ٢٠\٢\٢٠١٩ چەکدارانی حەشدی شەعبی هەڵیانکوتاوەتە سەر گوندی باوە مەحموو کە بارەگایەکی لیوای سێی پێشمەرگەی لێیە و هەوڵیان داوە ئەو بارەگایەی لیوای سێی پێشمەرگە ئەوێ چۆڵ بکەن، بەڵام سەرکەوتوو نەبوون و گەڕانەوە خانەقین".
ئەوەشی خستە ڕوو کە ئەمڕۆ پێنجشەممە ٢١\٢\٢٠١٩ لە شارەدێی جەلەولا تەقە لە هاووڵاتییانی سڤیل کراوە و بەو هۆیەشەوە کەسێک بریندار بووە".
شێخ جەعفەر مستەفا ئاماژەی بەوە دا: "ئێستا چەکدارانی حەشدی شەعبی بەناو زێدەڕەوییەوە هەوڵی داگیرکردنی زەوی و موڵک و ماڵی خەڵک دەدەن، بۆ ئەوەی بیکەن بە بارەگا بۆ خۆیان، جیا لەوەش خەڵک دەترسێنن بۆ ئەمەش لەلایەن بەغداوە پاڵپشتی دەکرێن و کارەکانیان بۆ جێبەجێ دەکرێت، بەڵام نازانرێ ئەو کەسەی پشتیوانیان لێ دەکات کێیە و ڕوونی کردەوە کە قایمقامی خانەقین کە لەسەر پشکی یەکێتییە لە شارەکەدا هیچی بەدەست نییە و پێم وا نییە پرسیشی پێ بکرێت".
باسنيوز
