ئه‌مه‌ریكا ھێزێكی تایبه‌ت له به‌غدا جێگیر دەكات
به‌گوێره‌ی راپۆرتێكی رۆژنامه‌ی "میلیته‌ری تایمز"ـی ئه‌مه‌ریكی، ئه‌و بڕیاره له یاداشتێكدا هاتووه كه پشكنه‌ری گشتی وه‌زاره‌تی به‌رگریی ئه‌مه‌ریكا هه‌فته‌ی رابردوو ده‌ریكردووه و جێگری پشكنه‌ری گشتی پلاندانان و ئۆپراسیۆنی تایبه‌ت له پینتاگۆن واژۆیان له‌سه‌ر كردووه.
به‌گوێره‌ی زانیارییه‌كانی رۆژنامه ئه‌مه‌ریكییه‌كه، ئامانجی پشكنه‌ری گشتی، به‌گوێره‌ی ئامانجه‌كانی ئه‌مه‌ریكا و هاوپه‌یمانی نێوده‌وڵه‌تی دژی داعش، دیاریكردنی چه‌ند خاڵێكه و ده‌یه‌وێت بگه‌نه ده‌ره‌نجامێك كه ئایا "ئه‌و راوێژ و هاوكارییانه‌ی پێشكه‌شی هێزه تایبه‌ته‌كانی عیراق ده‌كرێن به‌شی شكستهێنان به توندڕه‌وه‌كان ده‌كات؟".
له نوێترین داواكاریی بۆ هاوكاریكردنی ئه‌و هێزانه‌ش، وه‌زاره‌تی به‌رگری كۆنگرێسی ئاگادار كردووه‌ته‌وه كه پێویستیان به پاڵپشتییه بۆ مه‌شق و راهێنان و پڕچه‌ككردنی لیوایه‌ك كه هه‌ر كه‌تیبه‌یه‌كی له 670 كه‌س پێكبێت".
رۆژنامه‌كه نوسیوویه‌تی "ئه‌و كه‌تیبانه سه‌ر به ھێزی تایبه‌تی عێراقن و له به‌غدا جێگیر ده‌بن و ده‌یانه‌وێت ببنه هێزێك توانای ته‌واویان بۆ تێكشكاندن و شكستهێنان به داعش هه‌بێت".
رۆژنامه ئه‌مه‌ریكییه‌كه ئاماژه‌ی به‌وه‌شكردووه كه "هێزه تایبه‌ته‌كانی عێراق و له‌وانه‌ش دژه تیرۆر نزیكه‌ی نیوه‌ی ھێزه‌كانیان ساڵی 2017 له جه‌نگی ده‌ركردنی داعش له نه‌ینه‌وا و ناوچه‌كانی دیكه له ده‌ستداوه.
هه‌روه‌ها واشنتن جگه له‌وه‌ی له بوودجه‌ی ساڵی رابردوو داوای كۆمه‌كی زۆری بۆ ئه‌و ھێزانه كردبوو، له بوودجه‌ی ساڵی 2019 شدا داوایكردووه خه‌رجی بۆ مه‌شق و راهێنانی 24 كه‌تیبه‌ی سه‌ر به هێزه تایبه‌ته‌كانی عێراق ته‌رخان بكرێت كه هه‌ر كه‌تیبه‌یه‌كیان 300 تا 600 كه‌س له خۆده‌گرێت و كۆی گشتییان 13 هه‌زار كه‌سن.
وه‌زاره‌تی به‌رگریی ئه‌مه‌ریكا هیواداره هاوكار بێت بۆ ئه‌وه‌ی له رێگه‌ی ئه‌و پاڵپشتیانه‌وه، هێزه تایبه‌ته‌كان و یه‌كه‌كانی دژه تیرۆری عێراق بگه‌ڕێنه‌وه سه‌ر ئه‌ركه بنه‌ڕه‌تییه‌كانیان كه به‌ره‌نگاربوونه‌وه‌ی تیرۆریست و توندڕه‌وه‌كانه.
K24
