پەرلەمانتاێکی هاوپەیمانییەکەی سەدر رایدەگەیەنێت، کە هەرکەسێک سەردانی ئیسرائیل بکات، ئەوان سزای دەدەن.

ئەمڕۆ دووشەممە 7-1-2019، موزیڕ خەزعەل، پەرلەمانتاری هاوپەیمانیی سائیرون بە میدیا عێراقییەکانی راگەیاندووە، سەردانکردنی هەموو هاووڵاتییەک یان بەرپرسێکی عێراقی بۆ ئیسرائیل، ”خیانەتە لە نیشتمان“ و ئەوان هەر جۆرە سەردانێک بۆ ئەو وڵاتە، رەت دەکەنەوە.

موزیڕ خەزعەل، کە هاوپەیمانییەکەی لەلایەن موقتەدا سەدری رێبەری رەوتی سەدر سەرۆکایەتی دەکرێت، ئاماژەی بەوەش کردووە، سەردانکردنی ئیسرائیل ”بە هەر بیانوویەک بێت رەت دەکەینەوە و سزای هەموو ئەو کەسانەش دەدەین، کە سەردانی ئەو وڵاتەیان کردووە و دەکەن“.

ئەو لێدوانەی ئەو پەرلەمانتارەی سائیرون لەکاتێک دایە، کە رۆژی یەکشەممە 6-1-2019، میدیا ئیسرائیلییەکان بڵاویان کردەوە، کە سێ شاندی عێراقی لە کۆتایی ساڵی 2018 بە فەرمی سەردانی ئیسرائیلیان کردووە.

عێراق هاوشێوەی زۆربەی وڵاتانی عەرەبی و ئیسلامی، خۆی وەک دوژمنێکی ئیسرائیل ناساندووە و پێی وایە دەوڵەتی ئیسرائیل لەسەر خاکی فەلەستین دامەزراوە.












باسنيوز