حكوومه‌تی ئیسرائیل : له ماوه‌ی چه‌ند هه‌فته‌یه‌كدا سێ شاندی سیاسی عێراقی سه‌ردانی ئیسرائیلیان كردووه
وه‌زاره‌تی ده‌ره‌وه‌ی ئیسرائیل روونیكردووه‌ته‌وه كه له‌ناو ئه‌و شاندانه‌دا، كه‌سایه‌تی شیعی و سووننی و سه‌ركرده‌ی تێدا بووه كه كاریگه‌رییان له‌سه‌ر عێراق هه‌یه. ئه‌و كه‌سایه‌تیانه سه‌ردانی مۆزه‌خانه‌ی "یاد فاشیم"ـیان كردووه بۆ ئه‌وه‌ی رێز له بیره‌وه‌ری ئه‌و جووانه بگرن كه سووتێنران.
هه‌روه‌ها ئاماژه به‌وه‌كراوه كه ئه‌و شاندانه له‌گه‌ڵ هه‌ندێك كه‌سایه‌تی ئه‌كادیمی و به‌رپرسانی ئیسرائیل كۆبوونه‌ته‌وه و ژماره‌ی ئه‌ندامانی ئه‌و شاندانه 15 كه‌س بوون و وه‌زاره‌تی ده‌ره‌وه‌ی ئیسرائیل پێشوازی له‌و ده‌ستپێشخه‌رییه كردووه.
رۆژی یه‌كشه‌ممه رۆژنامه‌وانی ئیسرائیلی، ئه‌یدی كۆهین ئه‌وه‌ی ئاشكرا كردبوو كه سێ شاندی عێراق به "فه‌رمی" سه‌ردانی ئیسرائیلیان كردووه بۆ ئه‌وه‌ی گفتوگۆ له‌سه‌ر سێ ته‌وه‌ر بكه‌ن. له كاتێكدا له‌ساڵی 1948 وه تا ئێستا دابڕان له نێوان ته‌لئه‌ڤیڤ و به‌غدا هه‌یه.
كۆهین گوتوویه‌تی: "به‌م دوواییانه به‌غدا سێ شاندی باڵای ناردووه‌ته ئۆرشه‌لیم (قودس) بۆ ئه‌وه‌ی له‌باره‌ی سێ ته‌وه‌ره‌وه گفتوگۆ له‌گه‌ڵ ئیسرائیل بكه‌ن.
له‌باره‌ی ته‌وه‌ره‌كانیشه‌وه نوسیوویه‌تی: "كشانه‌وه‌ی ئێرانییه‌كان له باشووری سووریا به‌رامبه‌ر راگرتنی بۆردوومانه‌كانی ئیسرائیل و ئاساییكردنه‌وه‌ی په‌یوه‌‌ندییه‌كان له‌گه‌ڵ عێراق و سووریا و لوبنان و وڵاتانی كه‌نداو و ئه‌و ته‌وه‌ره‌كه‌ی دیكه‌ش بۆ بڵاوكردنه‌وه گونجاو نییه".
كۆهین له تویتێكی دیكه‌دا ده‌ڵێت "پێشتر ئاگاداری سه‌ردانی شاندی عێراقی بووین بۆ ئیسرائیل، ئه‌مڕۆش ته‌له‌ڤزیۆنی ئیسرائیل زانیاری له‌باره‌ی سه‌ردانی سێ شاند ئاشكر كردووه كه له عێراقه‌وه هاتوون نه‌ك كوردستان".
هه‌روه‌ها گوتوویه‌تی: "یه‌كێك له‌و كه‌سانه‌ی له حه‌نان فه‌تلاوی نزیكه‌ی گوتوویه‌تی: "ناوی هه‌ندێك له‌و كه‌سانه‌م لایه سه‌ردانی ئیسرائیلیان كردووه، به‌ڵام به‌هۆی ترس له ژیانی ئه‌و كه‌سانه ئاشكرایان ناكه‌م".
كۆهین له تویتێكی دیكه‌دا ده‌ڵێت: "دان به‌وه‌دا ده‌نێم كه تا ئه‌م دوواییانه زانیاریم له‌باره‌ی نزیكبوونه‌وه‌ی نێوان ئیسرائیل و عێراق نه‌بووه، به‌ڵام پێش چه‌ند خوله‌كێك ته‌له‌فۆنم له‌گه‌ڵ به‌رپرسانی باڵای ئیسرائیل كردووه و زانیوومه 12 نوێنه‌ری عێراقی له رێگه‌ی ئوردن و توركیا و ئه‌وروپاوه له سه‌ره‌تای ساڵی 2018 وه سه‌ردانی ئیسرائیلیان كردووه".
هه‌روه‌ها ئه‌و رۆژنامه‌وانه ئیسرائیلییه له فه‌یسبووكه‌وه نوسیوویه‌تی: "30 نوێنه‌ری عێراقی داوایان كردووه به نهێنی سه‌ردانی ئیسرائیل بكه‌ن".
ئه‌وه له كاتێكدایه له‌م ساڵانه‌ی دواییدا چالاكوانان هه‌ڵمه‌تێكیان بۆ ئاساییكردنه‌وه‌ی په‌یوه‌ندییه‌كانی عێراق و ئیسرائیل ده‌ستپێكردووه.
باسنيوز
