سەرۆک وەزیرانی عێراق داوای دواخستنی کارێک لە پەرلەمانی وڵاتەکەی دەکات.



بەپێی نووسراوێک، عادل عەبدولمەهدی، سەرۆک وەزیرانی عێراق رایگەیاندووە، هێشتا کێشەی لایەنە شیعەکان لەسەر دیاریکردنی وەزیری ناوخۆ و لایەنە سوننییەکانیش لەسەر دیاریکردنی وەزیری بەرگری، یەکلا نەبووەتەوە.



عادل عەبدولمەهدی نووسراوەکەیئاراستەی سەرۆکایەتیی پەرلەمان کردووە و داوای کردووە دەنگدان بە کاندیدانی وەزارەتەکانی ناوخۆ و بەرگری نەخرێتە ناو بەرنامەی کاری دانیشتنی داهاتووی پەرلەمان.



عادل عەبدولمەهدی، سەرۆک وەزیرانی نوێی عێراق، درەنگانی شەوی چوارشەممە 24/10/2018 لە پەرلەمانی وڵاتەکەی سوێندی یاسایی خوارد و 14 وەزیر لە کابینەکەی متمانەیان وەرگرت و هەشت وەزیریش بەهۆی رێکنەکەوتنی لایەنەکان، متمانەیان پێ نەدرا.



رۆژی سێشەممە 18/12/208، لە دانیشتنی پەرلەمانی عێراقدا لە کۆی هەشت وەزارەتە بەتاڵەکە، سێ وەزارەت پڕ کرانەوە و کاندیدی سێ وەزارەتیش رەت کرانەوە و متمانەیان پێ نەدرا، پڕکردنەوەی هەردوو وەزارەتی ناوخۆ و بەرگریش یەکلا نەکرایەوە.



بەپێی تەوافوقی لایەنە سیاسییە کوردستانی و عێراقییەکان، وەزارەتی ناوخۆ پشکی شیعەکانە، وەزارەتی بەرگری پشکی سوننەکانە و لەنێوان وەزارەتەکانی دەرەوە و داراییدا، یەکێکیان بۆ کوردە.




باسنیوز