ئەندامێکی خولی پێشووی پەرلەمانی کوردستان، ئاشکرای کرد، ئافرەتانی مەسیحی لە بازگەکانی حەشدی شەعبی سووکایەتییان پێ دەکرێت و داوای گۆڕینی ئایینیان لێ دەکرێت.



وەحیدە یاقۆ، ئەندامی خولی چوارەمی پەرلەمانی کوردستان، ڕاگەیاند، ئافرەتانی مەسیحی کاتێک هاتوچۆ لە نێوان پارێزگاکانی هەرێمی کوردستانەوە دەچن بۆ پارێزگای نەینەوا و دەشتی نەینەوا، لەلایەن حەشدی شەعبییەوە بەهۆی سەروسیما و جلوبەرگیانەوە دەناسرێنەوە و داوای ناسنامەیان لێ دەکرێت. گوتیشی: ”ئەو ئافرەتە مەسیحییانە سووکایەتییان پێ دەکرێ و ڕەفتاری ناشایستەیان بەرامبەر ئەنجام دەدرێت“.



ڕوونیشی کردەوە کە بەشێک لەو ئافرەتانەی سووکایەتییان پێ کراوە، پێیان ڕاگەیاندوون کە بەهۆی بازگەکانی حەشدی شەعبییەوە ڕووبەڕووی زەحمەتییەکی زۆر دەبنەوە و ”تەنانەت لەو بازگانە داوای گۆڕینی ئایینیشیان لێ دەکرێت“.



وەحیدە یاقۆ داوای کرد کە بازگەکانی حەشدی شەعبی لە ناوچەکە نەمێنێت و پێشمەرگەی کوردستان بۆ سەرجەم ناوچەکانی مەسیحینشین لە دەشتی نەینەوا بگەڕێتەوە، چونکە ”ئێستا تەلسقۆف لەژێر کۆنتڕۆڵی پێشمەرگە دایە و ئافرەتانی مەسیحی هەم دڵخۆش و هەم ڕێزلێگیراون، تەنانەت لەبەر بەرقەراربوونی ئاسایش لە تەلسقۆف، شارەکە بووەتە بنکەیەکی گرنگی مەسیحییەکانی ناوچەکە“.







باسنيوز