ئه‌و سه‌ركرده‌یه‌ی داعش كه 21 پێشمه‌رگه‌ى به‌جلى پرته‌قاڵییه‌وه ده‌سووڕانده‌وه ده‌ستگیر كرا
سه‌رچاوه‌یه‌ك له دادگاى لێكۆڵینه‌وه‌ى كه‌رخ تایبه‌ت به دۆسییه‌كانى تیرۆر، ڕای گه‌یاند: "دادگا دانپێنانى تاوانبارى تیرۆریست ئه‌بوو حه‌مزه كوردی، كه به‌رپرسی چه‌ندین كرده‌وه‌ى تیرۆریستییه و پۆستى والى باكوورى به‌غداى به‌ده‌سته‌وه بووه پێش ئه‌وه‌ى ببێت به‌والى كه‌ركووك و له‌چه‌ند بڵاوكراوه‌یه‌كدا ده‌رده‌كه‌وێت، تۆمار كرد".
هاوكات، ئه‌نجومه‌نى باڵاى دادوه‌رى عێراق، له ڕاگه‌یاندراوێكدا، ڕای گه‌یاندووه: "دیارترین ئه‌و كرده‌وه تیرۆریستییانه‌ى ئه‌بوو حه‌مزه كوردى لێیان به‌رپرسه، دیلكردنى 21 ئه‌فسه‌ر و پێشمه‌رگه‌ى كوردستان بووه، كه دواتر وێنه‌یان تۆمار كرا و له به‌رگێكى پرته‌قاڵییه‌وه له‌ناو شارى مووسڵ، به ئۆتۆمبێل ده‌یانسووڕاندنه‌وه".
ئاماژه به‌وه‌ش دراوه، كه دادگا دانپێنانه‌كانى ئه‌و تیرۆریسته‌ى تۆمار كرد و هه‌موو ڕێكارێكی یاسایی به‌پێی ماده‌ى 1/4 له یاسای دژه تیرۆر، به‌رامبه‌رى گیراوه‌ته‌به‌ر.
باسنيوز
