سیاسەتمەداری راسپێردراو بە پێکهێنانی حکوومەتی نوێی عێراق، بەغدای پایتەختی وڵاتەکەی بەجێ هێشت.

بەپێی هەواڵی میدیا عێراقییەکان، دوای نیوەڕۆی رۆژی پێنجشەممە 11/10/2018، عادل عەبدولمەهدی، سیاسەتمەداری راسپێردراو بە پێکهێنانی حکوومەتی نوێی عێراق بە سەردانێک گەیشتە شاری نەجەف لە باشووری عێراق.

عادل عەبدولمەهدی لەو سەردانەیدا بۆ نەجەف، لەگەڵ موقتەدا سەدر، رێبەری رەوتی سەدر و سەرۆکی هاوپەیمانیی سائیرون کۆ دەبێتەوە و تاوتوێی دوایین پێشهاتەکانی پێکهێنانی حکوومەتی نوێی عێراق دەکەن.

دوای نزیکەی پێنج مانگ لە هەڵبژاردن، رۆژی 2/10/2018 لایەنە عێراقییەکان رێککەوتن لەسەر راسپاردنی عادل عەبدولمەهدی، سیاسەتمەدار و سەرکردەی پێشووی ئەنجومەنی باڵای ئیسلامی بۆ پێکهێنانی کابینەی نوێی حکوومەت، کە بەپێی دەستوور، ماوەی یەک مانگی لەبەردەستە بۆ پێکهێنانی حکوومەتی نوێی وڵاتەکەی.

رۆژی شەممە 12/5/2018 پرۆسەی دەنگدانی گشتی لە هەڵبژاردنی خولی چوارەمی پەرلەمانی عێراق لەو وڵاتە و هەرێمی کوردستان ئەنجام درا و رۆژی 19/8/2018ش دادگای فیدڕالیی عێراق ئەنجامەکەی پەسەند کرد.










باسنيوز