ئەندامێکی پەرلەمانی عێراق لە فراکسیۆنی پارتی ڕای دەگەیەنێت، ئەمڕۆ سێشەممە لە ئەنجومەنی نوێنەرانی عێراق گفتوگۆ لەسەر پێکهێنانی لێژنە هەمیشەییەکان دەکرێت.



د. محەمەد شاکر، ئەندامی پەرلەمانی عێراق لە فراکسیۆنی پارتی بە (باسنیوز)ی ڕاگەیاند: "کاتژمێر ١٢ی نیوەڕۆی ئەمڕۆ سێشەممە ٩\١٠\٢٠١٨ کۆبوونەوەی پەرلەمانی عێراق ئەنجام دەدرێت، کۆبوونەوەکەش لە سێ تەوەر پێکهاتووە".



ئەو پەرلەمانتارەی پارتی گوتیشی: "یەکێک تەوەرەکان ناو نان و دەستنیشانکردنی دوو بڕیاردەری پەرلەمانە کە یەکێکیان لە پێکهاتەی تورکمان و ئەوی دیکەش لە پێکهاتەی مەسیحی دەبێت، تەوەری دووەم دەنگدانە لەسەر لێژنەی پێداچوونەوەی پەیڕەوی ناوخۆی پەرلەمان و هەڵبژاردنی ئەندامەکانییەتی".



سەبارەت بە تەوەری سێیەمی کۆبوونەوەکە ئاماژەی بەوە کرد: "لەتەوەری سێیەمدا گفتوگۆ لەسەر پێکهێنانی لێژنە هەمیشەییەکانی پەرلەمان دەکرێت".




باسنیوز