بەڕێوەبەری هەواڵگریی سەربازیی رژێمی بەعس و راوێژکاری سەرۆک کۆماری پێشووتری عێراق فەرمانی لەناوبردنی مەزارە پیرۆزەکانی شیعەمەزهەبەکانی داوە.

ناجح میزان، یەکێک لە سەرکردەکانی سوننەمەزهەکان لە گرتەیەکی ڤیدیۆییدا باسی مێژووی خراپەکاریی و دژە شیعەیی وەفیق سامەڕایی دەگێڕێتەوە، کە ئێستاش لە دژی گەلی کوردستان و سوننە، بەردەوام خۆی وەک بەرگریکارێک لە شیعە و حەشدی شەعبی نیشان دەدات.


وەفیق سامەڕایی لە سەردەمی رژێمی بەعسی عێراق بەڕێوەبەری دەزگای هەواڵگریی سەربازیی بوو و لە ساڵی 2005ـیش بووە راوێژکاری جەلال تاڵەبانیی سەرۆک کۆماری پێشووتری عێراق.


ناجیح میزان هەروەها رایگەیاندووە، لە ساڵی 1991 بە فەرمانی وەفیق سامەڕایی، قوتابخانەی شیرازیی شیعەمەزهەبەکان لە سامەڕا وێران کرا و کتێب و دەستنووسەکانی لەناوبردران.

ناجح میزان لە گرتە ڤیدیۆییەکەدا، کە لە بەرنامەیەکی تەلەڤزیۆنی وەرگیراوە و لە تۆڕە کۆمەڵایەتییەکان بڵاو کراوەتەوە، رایگەیاندووە، وەفیق سامەڕایی فەرمانی بە حازم راوی، فەرماندەی هێزی مووشەکهاوێژی بەعس کردبوو، مەزارەکانی ئیمام عەلی لە نەجەف و حوسێنی کوڕی ئیمام عەلی لە کەربەلا، بە مووشەک لەناو ببات.



هەروەک میزان گێڕاویتییەوە، گفتوگۆیەک لەنێوان وەفیق سامەڕایی و حازم راوی دروست بووە، کە بەمشێوەیە بووە؛



وەفیق سامەڕایی: ئەو بتخانانەم بۆ بە مووشەک لەناو ببە.

حازم راوی: کام بتخانە؟

وەفیق سامەڕایی: ئەو دوو بتخانەیەی لە نەجەف و کەربەلادان.

حازم راوی: ببوورە ناتوانم، ەترسم خوا تووشی جەڵتەم بکات، ئەگەر دەتەوێ خۆت مووشەکبارانیان بکە.









باسنيوز