کۆشکی سپی (کۆشکی سەرۆکایەتیی ئەمریکا) هۆشداریی لە هێرشی هاوپەیمانەکانی کۆماری ئیسلامیی ئێران لە عێراق، دەدات.



لە بەیاننامەیەکدا، نووسینگەی راگەیاندنی کۆشکی سپی رایگەیاندووە، ئێران هیچ رێگرییەکی لەو لایەنانەی پاڵپشتیی دارایی و سەربازی لەو وڵاتە وەردەگرن نەکردووە، کە هێرشیان کردووەتە سەر باڵیۆزخانەی ئەمریکا لە بەغدا و کونسوڵخانەی ئەمریکا لە بەسرە.



لە بەیاننامەکەدا، کۆشکی سپی ئاماژەی بەوەش کردووە، کە ئەمریکا ئێران بە بەرپرسیار دەزانێت لە هەر هێرشێک، کە زیان بە هاووڵاتییان و بەرژەوەندییەکانی واشنتن بگەیەنێت.



هەروەک لە بەیاننامەکەدا هاتووە، لە ئەگەری زیانگەیاندن بە هاووڵاتییان و بەرژەوەنییەکانی ئەمریکا لەلایەن ئەو گرووپ و لایەنە عێراقییانەی ئێران پاڵپشتییان دەکات، ئەوا سوپای ئەمریکا وەڵامێکی ”خێرا و توند“ی دەبێت.



لە عێراق، زۆربەی لایەنە سیاسییە شیعییەکان و میلیشیاکانی حەشدی شەعبی، بە شانازییەوە باس لەوە دەکەن، کە هاوکارییە دارایی و سەربازییەکانیان لە ئێران وەردگرن و پابەندیی خۆیان بە سیاسەتەکانی تارانەوە راگەیاندووە.




باسنيوز