بە فەرمانی حکوومەت، سوپای عێراق هاتوچۆ لە شاری بەسرەی باشووری وڵاتەکەی قەدەغە دەکات.

فەرماندەیی ئۆپەراسیۆنەکانی بەسرەی سوپای عێراق لە بەیاننامەیەکدا رایگەیاندووە، لە کاتژمێر 3ـی دوای نیوەڕۆی رۆژی پێنجشەممە 6/9/2018ـەوە تا کاتێکی نادیار، هاتوچۆ لە سەنتەری پارێزگای بەسرە و هەموو شارۆچکەکانی پاریزگاکە قەدەغەیە.

قەدەغەکردنی هاتوچۆ بۆ رێگرتنە لە خۆپیشاندانی خەڵکی پارێزگاکە دژی نەبوونی خزمەتگوزارییە سەرەتاییەکانی ژیان، وەک ئاوی خواردنەوە.

رۆژی چوارشەممە 5/9/2018، سەرۆک مەسعود بارزانی لە پەیامێکدا بۆ خەڵکی بەسرە، ناڕەزایی خۆی بەرامبەر بەکارهێنانی توندوتیژی دژی خۆپیشاندەران دەربڕی و داواشی لە خۆپیشاندەران کرد ئارامیی خۆپیشاندانەکانیان بپارێزن.

دوای ئەو پەیامەی سەرۆک بارزانی، هاووڵاتییانی بەسرە لە تۆڕە کۆمەڵایەتییەکان وێڕای سوپاسکردنی سەرۆک بارزانی، داوای لێبووردنیان لە بارزانی و گەلی کوردستان کردووە، کە ماوەیەک دژی سەربەخۆیی کوردستان بوون و ئاماژەیان بەوە کردووە، کە گەلی کوردستان مافی خۆیەتی لە عێراق جیابێتەوە.

لە ناوەڕاستی مانگی 7ـی 2018ـەوە، هاووڵاتییانی بەسرە و دواتریش شارەکانی دیکەی باشووری عێراق دژی نەبوونی خزمەتگوزارییەکانی ئاوی شیرین و کارەبا و بێکاریی گەنجان، خۆپیشاندان دەکەن.

بەهۆی بەکارهێنانی توندوتیژی لەلایەن هێز و میلیشیا عێراقییەکانیشەوە، نزیکەی یەک هەزار خۆپیشاندەر کوژراون و بریندار بوون، جگە لە دەستگیرکرانی سەدانی دیکە.

پێشتر دەزگای خێرخوازیی بارزانی وەک ئەرکێکی مرۆیی، یەک ملیۆن و 300 هەزار لیتر ئاوی خواردنەوەی بە بارهەڵگر بۆ خەڵکی بەسرە نارد و لەڕێی فڕۆکەخانەشەوە هاوکاریی و پێویستییە سەرەکییەکانی ژیان، بۆ ئەو خەڵکە دەنێرێت.

بەسرە کەوتووەتە باشووری عێراق، بە یەکێک لە شارە هەرە دەوڵەمەندەکانی جیهان لە رووی سامانی سروشتییەوە دادەنرێت و شادەماری ئابووریی عێراقە، بەڵام حکوومەتی ئەو وڵاتە تەنانەت ئاوی خواردنەوەشی بۆ ئەو خەڵکە دابین نەکردووە.










باسنيوز