رێبەری رەوتی سەدر دوا مڵەت بە حکوومەتیوڵاتەکەی دەدات و ماوەیەکیش دیاری دەکات.

رۆژی پێنجشەممە 6/9/2018، موقتەدا سەدر، رێبەری رەوتی سەدر لە وتارێکدا رایگەیاندووە، ئەگەر حکوومەتی عێراق بەدەنگ داواکەیەوە نەچێت، ئەوا ”کاردانەوەیەکمان دەبێت هیچ کەس بیری بۆ ناچێت و تەختی گەندەڵکاران دەهەژێنێت“.

نموقتەدا سەدر ماوەی چەند رۆژێکی وەک مۆڵەت دایە حکوومەتی عێراق بۆ چارەسەرکردنی کێشەکانی بەسرە و بەدەنگەوەهاتنی داواکاریی خۆپیشاندەران و رایگەیاندووە، ”ئەگەر تا رۆژی یەکشەممەی داهاتوو کێشەکانی بەسرە چارەسەر نەکرێن“، ئەوا ئەو تەختی گەندەڵکاران دەهەژێنێت.

لە ناوەڕاستی مانگی 7ـی 2018ـەوە، هاووڵاتییانی بەسرە و دواتریش شارەکانی دیکەی باشووری عێراق دژی نەبوونی خزمەتگوزارییەکانی ئاوی شیرین و کارەبا و بێکاریی گەنجان، خۆپیشاندان دەکەن.

بەهۆی بەکارهێنانی توندوتیژی لەلایەن هێز و میلیشیا عێراقییەکانیشەوە، نزیکەی یەک هەزار خۆپیشاندەر کوژراون و بریندار بوون، جگە لە دەستگیرکرانی سەدانی دیکە.

پێشتر دەزگای خێرخوازیی بارزانی وەک ئەرکێکی مرۆیی، یەک ملیۆن و 300 هەزار لیتر ئاوی خواردنەوەی بە بارهەڵگر بۆ خەڵکی بەسرە نارد و لەڕێی فڕۆکەخانەشەوە هاوکاریی و پێویستییە سەرەکییەکانی ژیان، بۆ ئەو خەڵکە دەنێرێت.

بەسرە کەوتووەتە باشووری عێراق، بە یەکێک لە شارە هەرە دەوڵەمەندەکانی جیهان لە رووی سامانی سروشتییەوە دادەنرێت و شادەماری ئابووریی عێراقە، بەڵام حکوومەتی ئەو وڵاتە تەنانەت ئاوی خواردنەوەشی بۆ ئەو خەڵکە دابین نەکردووە.










باسنيوز