خۆپیشاندەرێکی بەسرە بە گوللەی هێزە ئەمنییەکانی عێراق کوژرا و خۆپیشاندانەکان فراوانتر دەبن.

شەوی دووشەممە 3/9/2018، مەکی یاسر ئەلکەعبی، کە لە 30کانی تەمەنیەتی، بە گوللەی هێزە ئەمنییەکان کوژرا.

دوای کوژرانی ئەو گەنجە، خۆپیشاندانەکانی بەسرە فراوانتر بوون و هاووڵاتییان ناڕەزایی توندی خۆیان دژی وەڵام نەدانەوەی داواکانیان و بەکارهێنانی توندوتیژی دژیان، دەربڕی.

پێشتریش هێزە ئەمنییەکانی عێراق ژمارەیەک خۆپیشاندەریان دەستگیر کردبوو و بەشێوەیەکی دڕندانە گازی فرمێسکڕێژ و بۆمبی گازییان هەڵ دەدانە سەر.

لە ناوەڕاستی مانگی 7ـی 2018ـەوە، هاووڵاتییانی بەسرە و دواتریش شارەکانی دیکەی باشووری عێراق دژی نەبوونی خزمەتگوزارییەکانی ئاوی شیرین و کارەبا و بێکاریی گەنجان، خۆپیشاندان دەکەن.

بەهۆی نەبوونی پێداویستییە سەرەکییەکانی ژیان بەتایبەت ئاوی خواردنەوە و کارنەکردنی حکوومەتی عێراق بۆ دابینکردنی ئاو بۆ خەڵکی بەسرە، پێشتر دەزگای خێرخوازیی بارزانی یەک ملیۆن و 300 هەزار لیتر ئاوی خواردنەوەی بە بارهەڵگر بۆ خەڵکی بەسرە نارد و لەڕێی فڕۆکەخانەشەوە هاوکاریی و پێویستییە سەرەکییەکانی ژیان، بۆ ئەو خەڵکە دەنێرێت.

بەهۆی بەکارهێنانی توندوتیژی لەلایەن هێز و میلیشیا عێراقییەکانیشەوە، زیاتر لە 750 خۆپیشاندەر کوژراون و بریندار بوون، جگە لە دەستگیرکرانی سەدانی دیکە.

بەسرە کەوتووەتە باشووری عێراق، بە یەکێک لە شارە هەرە دەوڵەمەندەکانی جیهان لە رووی سامانی سروشتییەوە دادەنرێت و شادەماری ئابووریی عێراقە، بەڵام حکوومەتی ئەو وڵاتە تەنانەت ئاوی خواردنەوەشی بۆ ئەو خەڵکە دابین نەکردووە.










باسنيوز